Էլեկտրամոբիլները Հայաստան կներկրվեն առանց ԱԱՀ-ի

Այսօր կառավարության նիստում բնապահպանության փոխնախարար Իրինա  Ղափլանյանը ներկայացրեց որոշում, ըստ որի` նախատեսվում է ԱԱՀ-ից ազատված գործարքների և գործառնությունների ցանկում ներառել  էլեկտրամոբիլների ներմուծումը մինչև 2022թ  հունվարի 1-ը: Դա կնպաստի էլեկտրամոբիլների ներմուծմանն ու կիրառմանը, մթնոլորտի աղտոտվածության նվազեցմանը: Փոխնախարարը նշեց, որ 2017-ին Հայաստան է մտել 28 մեքենա, իսկ 2018-ին` 33 մեքենա:

Ֆինանսների նախարար Ատոմ Ջանջուղազյանը որոշման հետ կապված վերապահումներ ու հակափաստարկներ ուներ: «Հարկային արտոնություններին պետք է վերաբերվել խնամքով»,- ասաց նա` ակնարկելով, որ որոշ արտոնությունների պատճառով հարկեր չեն մտնելու բյուջե, և թե ինչ են ստանալու դրա փոխարեն, պարզ չէ:

ՊԵԿ նախագահն առաջարկեց մեկ տարով հետաձգել հարցի ընդունումը:

Հարցը երկար քննարկվեց կառավարության նիստում: Ի վերջո, որոշվեց հաստատել որոշումը, քանի որ այն պիլոտային ծրագիր է և կարելի է փորձարկել մինչև 2022 թվականը: