Ներքին և արտաքին ուժերը փորձել են ազդեցություն բանեցնել Դաշնակցության վրա, բայց չի հաջողվել. Արսեն Համբարձումյան

Երևանում՝ Հայաստանի Առաջին հանրապետության հիմնադիր Արամ Մանուկյանի արձանի մոտ, Հայ Յեղափոխական Դաշնակցությունը սկսեց իր նախընտրական քարոզարշավը՝   «Հավատարիմ հողին ու հային» կարգախոսի ներքո:

 ՀՅԴ Հայաստանի Գերագույն մարմնի ներկայացուցիչ Արսեն Համբարձումյանը ելույթում նշեց, որ սկիզբ են դնում քարոզարշավին՝ վստահությամբ, որ հաղթելու են: Իսկ իրենց  կարգախոսը յուրաքանչյուր դաշնակցականի էությունն է:

«Մեր նպատակն է կառուցել ազատ քաղաքացու արդար և հզոր  երկիր: Կառուցել ազատ, անկախ և միացյալ Հայաստան: ՀՅԴ-ն հանդես է գալիս ազգային արժեքների պահպանման, առանց զիջումների զարգացման, սոցիալական արդարության դիրքերից»,- շեշտեց նա՝ նշելով, որ առաջիկա ընտրությունները կանխորոշելու են երկրի զարգացման ապագան:

«Ընտրություններին մասնակցող ուժերը՝ հին և նոր, ձեր տեսադաշտում են: Համեմատեք և կտեսնեք, որ Դաշնակցությունը տարբերվում է բոլորից, քանի որ մեկ անձի կուսակցություն չենք, ունենք գաղափարական և ծրագրային սկզբունքներ: Մենք երբեք ամբոխավար չենք եղել և չենք լինելու, որովհետև չենք ասել մի բան և հետո՝ մեկ այլ: Մենք ինքնուրույն քաղաքական ուժ ենք»,- նշեց Համբարձումյանն՝ ակնարկելով, որ ներքին և արտաքին ուժերը փորձել են ազդեցություն բանեցնել Դաշնակցության վրա, բայց դա որևէ մեկին չի հաջողվել և չի հաջողվելու, որովհետև Դաշնակցությունն ունի մեկ տեր՝ հայությունը:

Ըստ նրա՝ որքան ուժեղ լինի Դաշնակցությունը, այնքան երկիրն արդար ու խաղաղ կլինի: «Պետք է զարգանանք` առանց զիջելու, սա պետք է դառնա գործ»,- ասաց ՀՅԴ ԳՄ ներկայացուցիչը:

Հիշեցնենք, որ ՀՅԴ-ի 152 հոգանոց ցուցակի առաջին եռյակում են ՀՅԴ խմբակցության ղեկավար Արմեն Ռուստամյանը, ՀՅԴ ԳՄ ներկայացուցիչ Արսեն Համբարձումյանը եւ գյուղատնտեսության նախկին նախարար Արթուր Խաչատրյանը: Իսկ ՀՅԴ-ն քվեաթերթիկում 3-րդ համարն է։