Արցախի ՊԲ-ն մարտավարական զորավարժություններ է անցկացնում

Արցախի պաշտպանության բանակում նոյեմբերի 6-ից մեկնարկել են մարտավարական զորավարժություններ: Դրանք պլանային են և շարունակվելու են մինչև նոյեմբերի 10-ը: Այս մասին ֆեյսբուքյան իր էջում հայտնում է ՊԲ խոսնակ Սենոր Հասրաթյանը:

«Նպատակն է կատարելագործել ընդգրկված ուժերի և միջոցների մարտական ներդաշնակության մակարդակը, ստուգել զորամասերի մարտական պատրաստականության բարձր աստիճանների բերման պլանների իրատեսությունն ու նոր հաստիքապաշտոնային կառուցվածքի պայմաններում զորքերի մարտական կիրառման արդյունավետությունը:

Չորս փուլով անցկացվող զորախաղերի ընթացքում առանձնահատուկ ուշադրություն կդարձվի հրամանատարների և կառավարման մարմինների գործնական ունակությունների բարձրացման և ժամանակակից մարտում ստորաբաժանումների, զորատեսակների ու ծառայությունների միջև նպատակային փոխգործողության իրականացման վրա:

Ավարտական փուլում կխաղարկվի  «Մխրճված հակառակորդի ջախջախումը, առաջնագծի վերականգնումը, հարձակման զարգացումը և բարենպաստ բնագծերի գրավումը» թեմայով մարտական հրաձգությամբ զորավարժությունը»,- գրում է Հասրաթյանը: