Խաչատրյանի ստեղծագործություններն ունեն ազգային գույներ. Րաֆֆի Խարաջանյան

Հոկտեմբերի 25-ին Արամ Խաչատրյանի տուն-թանգարանում հնչեցին Արամ Խաչատրյանի դաշնամուրային ստեղծագործությունները։ Խաչատրյանի 6-րդ միջազգային փառատոնի շրջանակներում հայ մեծ կոմպոզիտորի դաշնամուրային գործերը ներկաների ունկնդրմանը ներկայացրին Խաչատրյանի անվան եռյակի դաշնակահարուհի, պրոֆեսոր Արմինե Գրիգորյանը և Լատվիայի երաժշտական ակադեմիայի պրոֆեսոր, Լատվիայի կոմպոզիտորների միության անդամ, արվեստագիտության դոկտոր, Լատվիայի վաստակավոր արտիստ Րաֆֆի Խարաջանյանը։

 

Արմինե Գրիգորյանը նշում է, որ Րաֆֆի Խարաջանյանի հետ վաղուց են համագործակցում, համատեղ հանդես են գալիս AR-RA դուետի շրջանակներում` ելույթ ունենալով տարբեր բեմերում։ 

 

Րաֆֆի Խարաջանյանը նշում է, որ ուրախ է հանդես գալ խաչատրյանական փառատոնի շրջանակներում։ Տեղեկացնենք, որ դաշնակահարը հեղինակել է «Արամ Խաչատրյանի դաշնամուրային ստեղծագործությունները» աշխատությունը, որը լույս է տեսել 1973 թվականին։ «Երջանկություն եմ ունեցել հանդիպելու Արամ Խաչատրյանի հետ, միասին նայում էինք գրքի ձեռագիր տարբերակը, վարպետն ինձ օգնել է խորհուրդներով։ Խաչատրյանի ստեղծագործություններն ունեն ազգային գույներ, և դրանք վառ արտահայտված են նաև նրա դաշնամուրային ստեղծագործություններում։ Խաչատրյանը կարողանում է դաշնամուրային ֆակտուրայի միջոցով թառի, քանոնի, հարվածային գործիքների հնչողության պատրանք ստեղծել»,- ասում է Րաֆֆի Խարաջանյանը։

 

Կամերային համերգի ընթացքում Արմինե Գրիգորյանն ու Րաֆֆի Խարաջանյանը ներկայացրին դաշնամուրային զուգանվագ։ Րաֆֆի Խարաջանյանը նկատում է, որ Արմինե Գրիգորյանը վայրկենապես է հասկանում իր ստեղծագործական ցանկությունները, ինչն օգնում է երաժշտությունն ավելի ներդաշնակ հասցնելու ունկնդրին։

 

Խաչատրյանական երեկոյի ընթացքում տեղի ունեցավ նաև դաշնակահարուհի Արմինե Գրիգորյանի՝ Արամ Խաչատրյանի դաշնամուրային ստեղծագործություններն ընդգրկող ձայնասկավառակի շնորհանդեսը:

 

Հիշեցնենք, որ այս օրերին անցկացվող Խաչատրյանի միջազգային փառատոնը կազմակերպել է Հայաստանի պետական սիմֆոնիկ նվագախումբը: