Կառավարությունը հավանություն տվեց ԸՕ բարեփոխումների նախագծին

Կառավարության արտահերթ նիստում ընդունվեց «ՀՀ ընտրական օրենսգիրք» ՀՀ սահմանադրական օրենքում փոփոխություններ և լրացումներ կատարելու մասին» հարցը:

Հիմնական զեկուցող` արդարադատության նախարար Արտակ Զեյնալյանը ներկայացրեց օրենքում նախատեսված փոփոխությունները: Նա նշեց, որ ընտրական օրենսդրության բարեփոխումների կարևորագույն նպատակն է Հայաստանում ժողովրդավարական ընտրական ինստիտուտի կայացումը:

Ըստ Զեյնալյանի` Ընտրական օրենսգրքի փոփոխություններն անդրադառնում են մի շարք հիմնարար խնդիրների:  Նա հայտարարեց, որ տարածքային ցուցակները վերանալու են, և ընդունվում է պարզ համամասնական ընտրակարգը:

Հաջորդ փոփոխությունը կոալիցիաների ձևավորման սահմանափակումների վերացումն է և ժամկետների ընդլայնումը` 6 օրից փոխելով 10 օրի:

«Կուսակցական բազմակարծության ապահովման նպատակով ընտրվելու նվազագույն շեմի իջեցում. կուսակցությունների համար անցողիկ շեմը սահմանվում է 4%` նախկին 5-ի փոխարեն, իսկ դաշինքների դեպքում` նախկին 7-ի փոխարեն 6%»,- ասաց նախարարը:

Ըստ նախագծի` իջեցվում է նաև ընտրագրավի գումարը, և խորհրդարան պարտադիր պետք է անցնի 4 կուսակցություն  (կուսակցությունների դաշինքներ): Բարելավվում է կանանց քվոտան, և վերանում է բոնուսային համակարգը: