Ոստիկանությունը հաստատեց՝ ՌԴ-ն հրաժարվել է Միքայել Հարությունյանի նկատմամբ հետախուզում իրականացնել

«Ինտերֆաքս»-ն այսօր հայտնել էր, որ ՌԴ-ն իր տարածքում չեղարկել է Մարտի 1-ի գործով մեղադրյալ Միքայել Հարությունյանի նկատմամբ հայտարարված հետախուզումը:

Yerkir.am-ի հետ զրույցում ոստիկանության հասարակայնության հետ կապերի և լրատվության վարչությունից հայտնեցին. «ՌԴ–ից ՀՀ ոստիկանություն նման գրություն ստացվել է»:

Ավելի վաղ հայտնել էինք, որ նման որոշում կայացվել է Հարությունյանի գործով նյութերի ուսումնասիրությունից հետո: Ըստ աղբյուրի` ՌԴ-ում Հարությունյանին ոչինչ չի սպառնում, սակայն, եթե նա հայտնվի ԱՊՀ երկրներում, նրան կարող են ձերբակալել և արտահանձնել ՀՀ-ին:

Նշենք, որ այս նյութի հրապարակմանը հաջորդեց վարչապետ Փաշինյանի գրառումը, որ բոլոր մարդասպանները պետք է պատժվեն: