Չարբախում Նվերը շենքի շքամուտքում դանակահարել էր տղամարդուն

Օգոստոսի 18-ի գիշերը Շենգավիթ վարչական շրջանում դանակահարություն էր կատարվել...

Դեպքից րոպեներ անց մի տղամարդ ոստիկանության Չարբախի բաժանմունք մտավ: Հայտնում էր, որ Շարուրի փողոցի շենքերից մեկի մոտ իրեն ծեծել են: Դանակահարության մասին ոչ մի խոսք: Չէր ճանաչում վնասվածք հասցնողին: Վերնաշապիկն ու դեմքն արյունոտ էին, ճակատին քերծվածքներ կային:

Ոստիկանները շտապօգնություն կանչեցին: Տուժողը տեղափոխվեց «Էրեբունի» բժշկական կենտրոն, որտեղից քիչ անց ոստիկանության Չարբախի բաժանմունքում ահազանգ ստացվեց, որ տղամարդը ճակատի քերծվածքներից բացի, որովայնի շրջանում կտրած-ծակած թափանցող վերք ունի: 
Թաքցրել էր, կամ տաք էր եղել, չէր նկատել, որ նաև դանակով են խփել:

Ոստիկաններն անհետաձգելի որոնողական աշխատանքներ սկսեցին: Անհրաժեշտ էր պարզել, որտեղ էր կատավել դեպքը, տուժողը հստակ հասցեն չէր հիշում, նաև ականատես վկաներ հայտնաբերել: 

Միջոցառումները շարունակվեցին և դանակահարությունը բացահայտվեց ժամեր անց` համայնքային ոստիկանության բաժանմունքում ստացված տեղեկություններն իրացնելու արդյունքում:
Համայնքային ոստիկանները նախ ճշտել էին, թե դեպքը որտեղ է կատարվել, ապա բնակիչների շրջանում իրականացրած հարցումների արդյունքում պարզել, որ տուժողին մարմնական վնասվածք է պատճառել Շարուրի փողոցի բնակիչ Նվեր Բաղդասարյանը: Նույն օրը նշված փողոցից Բաղդասարյանը բերման ենթարկվեց ոստիկանության Շենգավիթի բաժին:

Նվեր Բաղդասարյանը հենց իրենց շենքի շքամուտում էր դանակահարել տուժողին, որն, ըստ նախնական տվյալների, ալկոհոլի ազդեցության տակ բարձրաձայն հայհոյել էր` չընդունելով շենքի բնակիչների դիտողությունները, վեճի բռնվել Բաղդասարյանի հետ:
Հանգամանքները պարզվում են:
Նշանակվել է դատաբժշկական փորձաքննություն:
Նվեր Բաղդասարյանը ձերբակալված է:
Հարուցված քրեական գործի նախաքննությունը շարունակվում է: