Երեւանի քաղաքապետի թեկնածուների անունները մամուլում արդեն շրջանառվել են. Փաշինյան

ՀՀ վարչապետ Նիկոլ Փաշինյանն այսօր հրավիրած մամուլի ասուլիսում հերքեց մամուլում հայտնված այն լուրերը, թե ինքն է հորդորել Երևանի նախկին քաղաքապետ Տարոն Մարգարյանին` հրաժարական տալ: «Ես Տարոն Մարգարյանին ոչ մի բան չեմ հորդորել»,- ասաց նա:

Անդրադառնալով Երևանի քաղաքապետի ընտրություններում իրենց թեկնածուին` վարչապետն ասաց, որ ՔՊ-ում թեկնածուների անուններ քննարկվում են: «Մամուլում անուններ շրջանառվում են, զարմանում եմ, որ ասում եք` թեկնածու չունենք»,- հայտարարեց նա:

Հիշեցնենք, որ տևական ժամանակ է, ինչ մամուլում, որպես ՔՊ Երևանի քաղաքապետի թեկնածու, նշվում է Հայկ Մարությանի անունը:

Անդրադառնալով արտահերթ ընտրություններին` վարչապետն  ասաց, որ մարդկանց էյֆորիան չի անցնի, եթե ընտրություններն ավելի ուշ լինեն: «Ես հավաստիացնում եմ, որ ինչքան ժամանակը գնա, այնքան էյֆորիան մեծանալու է: Ժամկետ ասել ենք` մեկ տարվա ընթացքում, բայց դա կախված է նաև քաղաքական իրավիճակից, որովհետև հնարավոր է, որ դրա անհրաժեշտությունը մեկ ամսից առաջանա»,- նշեց նա:

Ինչ վերաբերում է խորհրդարանական ընտրությունների ժամանակ ընտրախախտումների (ՍԱՍ-ի Արտակ և այլն) շուրջ աղմկոտ բացահայտումներին, ապա Փաշինյանն ասաց, որ տեսական ընտրակեղծարարները պետք է տեսականորեն պատժվեն, բայց դրա համար պետք են փաստեր: «Եթե մենք հիմա առանց փաստերի, մամուլի գրածի հիման վրա մարդ դատենք, կասեք` մենք սրա համա՞ր էինք հեղափոխություն անում: Քրեական պատասխանատվության համար պետք է լինեն հիմքեր»,- ասաց նա և կոչ արեց բոլոր քաղաքացիներին` համագործակցել իրավապահ համակարգի հետ:

«ՀՀ-ում, առանց բավարար ապացույցների, որևէ մեկը չի դատվելու, նույնիսկ եթե ՀՀ գործող վարչապետը նախկինում շատ կոնկրետ քաղաքական հայատարարություն է արել, որ` այ էսինչը հանցագործ է, նա դրա հիման վրա չի դատվելու, որովհետև դա քաղաքական հայտարարություն է եղել: Մեր խնդիրը ոչ թե մարդկանց դատելն է, այլ ՀՀ-ում օրինականություն հաստատելը: Եթե ես հիմա ասեմ` էսինչ էսինչյանը պետք է դատվի, ո՞նց կվերաբերվեք դրան»,- եզրափակեց նա: