Երեւանի քաղաքապետի ընտրությունը՝ հուլիսի 16-ին

Երեւանի ավագանու արտահերթ ընտրությունները կանցկացվեն հուլիսի 16-ին` ժամը 11:00-ին: Ավագանու արտահերթ նիստում այս որոշումն ընդունվեց ձայների` 34 կողմ, 11 դեմ, 1 ձեռնպահ  հարաբերակցությամբ:

Նշենք, որ հուլիսի 16-ին ընտրություններ անցկացնելու առաջարկը ՀՀԿ խմբակցությանն էր: «Ելք»-ը ցանկանում էր, որ ընտրությունները նշանակվեն օգոստոսի 8-ին, սակայն որոշումը չընդունվեց ձայների` 15 կողմ, 34 դեմ, 1 ձեռնպահ հարաբերակցությամբ:

Նշենք, որ ավագանու խմբակցություններն առաջարկում են քաղաքապետի թեկնածուներ, եւ եթե ընտրությունները տապալվեն, կնշանակվեն նոր արտահերթ ընտրություններ:

«Երկիր ծիրանի» խմբակցություն անդամ Մարինա Խաչատրյանը հայտարարեց, որ քաղաքապետի իրենց թեկնածուն Զարուհի Փոստանջյանն է: Ըստ նրա` Փոստանջյանը ազնիվ է, արդար, անկաշառ եւ «մինչեւ հոգու խորքը կրքոտ սիրում է մեր Երեւանը»: «Երկիր ծիրանի»-ն պահանջում է ավագանու լուծարում եւ նոր ընտրություններ: