Վրաստանում քրեական գործ են հարուցել հայկական դրոշն այրելու կոչ արած ադրբեջանցու նկատմամբ

Վրաստանում  ադրբեջանցի Օրհան Աբասի դեմ քրեական գործ է հարուցվել «Ահաբեկչության կոչ» հոդվածով. հայտնում է Русарминфо-ն:

 Բանն այն է, որ նա  Facebook սոցիալական ցանցում 2016 թվականի ապրիլյան պատերազմի օրերին գրառում է արել և  դիմել  Վրաստանում բնակվող արդբեջանցիներին՝  կոչ անելով բողոքի ակցիա անցկացնել Վրաստանում Հայաստանի դեսպանատան առջև և հայկական դրոշ այրել:

Ըստ Աբասի`  2016 թվականի ապրիլին իրեն հրավիրել են հարցաքննության, ապա հայտնել, որ իր դեմ քրեական գործ է հարուցվել:

2018-ի մայիսին տեղի է ունեցել գործով առաջին դատական նիստը: Աբասն ազատ է արձակվել 6 հազար լարի գրավի դիմաց: Քրեական գործով վերջին նիստն անցկացվել է հունիսի 20-ին, որի ընթացքում դատախազը նրա համար առաջարկել է պատիժ՝ 2-6 տարի ազատազրկման տեսքով: