Ընտրություն կանենք իրավունքի ուժով. Նաիրա Զոհրաբյան

Մենք՝ որպես ամենամեծ ընդդիմադիր քաղաքական ուժ, ներկայացնելու ենք նաև մեր մոտեցումները, մեր տեսլականը, բայց մենք Նիկոլ Փաշինյանի հետ ունենք նաև համընդհանուր մոտեցում համազգային շարժման վերաբերյալ: Այս մասին հայտարարեց «Ծառուկյան» խմբակցության պատգամավոր Նաիրա Զոհրաբյանը:

Նրա խոսքով՝ իշխանությունը պետք է հեռանա: «Իշխանությունը նրանց պապական սեփականությունը չէ: Ի վերջո, պետք է արժանապատվություն ունենան՝ տեսնելով համազգային ընդվզումը, առանց մանիպուլյացիաների, առանց տրյուկների, ինչը հիմա փորձում է անել իշխող կուսակցությունը՝ իշխանությունը ձգելու համար, թողնել և հեռանալ»,- ասաց Զոհրաբյանը:

Հարցին, թե նա նույնպե՞ս կարծում է, որ ժողովրդի առաջարկած մարդը պետք է լինի վարչապետ և ժամանակավոր կառավարություն ձևավորվել, այսինքն՝ Փաշինյանի բոլոր պահանջներն իր համար ընդունելի՞ են, պատգամավորը պատասխանեց, որ ժողովրդի ձայնն ու որոշումը պետք է հարգել: «Հասկանալի է, որ ընտրությունը կատարվելու է խորհրդարանում, այսինքն՝ իրավունքի ուժով կանենք ընտրություն: Որքան Հանրապետական կուսակցությունը շուտ հասկանա, որ ավելորդ համառելը, ավելորդ ժամանակ ձգելը աշխատելու է ժողովրդի և իրենց դեմ, այնքան ավելի խաղաղ կլինի հանգուցալուծումը: Այս շարժումը մեկ բանի մասին է վկայում՝ ժողովրդի դեմ ոչ ոք չի կարող դուրս գալ, որևէ մեկը երբևէ հաղթանակ չի տարել: Գուցե եղել են կարճաժամկետ հաղթանակներ, բայց, մեծ առումով, ժողովրդի դեմ ցանկացած քայլ ի սկզբանե տապալված է»,- ասաց նա:

«Եթե ժողովուրդը Փաշինյանի թեկնածությունն առաջ քաշի, Դուք կպաշտպանե՞ք» հարցին էլ Զոհրաբյանը պատասխանեց, որ իրենք կքննարկեն միասնական թեկնածու ունենալու հարցը: «Ինձ համար անձնապես ընդունելի է Փաշինյանի թեկնածությունը և չեմ կարծում, որ մեր կուսակցությունում այդ թեկնածությանը դեմ լինեն»,- նշեց նա:

Նրա խոսքով՝ իշխանության հետ բանակցությունների պետք է նստեն միայն իրենց օրակարգով՝ իշխանությունն անցնցում հանձնելու:

Մեկ այլ հարցի` այնուհանդերձ, մեկ շաբաթ առաջ կուսակցությունում տեղի ունեցավ երկփեղկում և խմբակցության անդամների միայն 1/3-ը դեմ քվեարկեց Սերժ Սարգսյանի՝ վարչապետ լինելուն,  Զոհրաբյանը պատասխանեց` այո, դուք իրավունք ունեք այդ հարցը մեզ տալու: «Այո, ես և մի քանի իմ ընկերներ դեմ ենք քվեարկել, և ես մնում եմ այն կարծիքին, որ իմ գործընկերները չպետք է կողմ քվեարկեին: Ես իրավունք չունեմ որևէ մեկին մեղադրելու, քանի որ կայացվել էր ազատ քվեարկելու որոշում, բայց իմ խիղճը թելադրել է դեմ քվեարկել:  Կարծում եմ՝ յուրաքանչյուրն ուներ ինչ-որ մոտիվացիա՝ ինձ համար անհասկանալի և անընդունելի մոտիվացիա»,- ասաց նա: