Վանի՝ ձեռք չդիպած գեղեցկությունը. հայկական Կտուց կղզին՝ թուրքական կայքի ուշադրության կենտրոնում. տեսանյութ

Ներկայիս Թուրքիայի տարածքում գտնվող Վանի նշանավոր Կտուց կղզին հայտնվել է թուրքական իշխանամետ «Անադոլու» լրատվական գործակալության ուշադրության կենտրոնում:

Թուրքերի շրջանում «Չարփանաք» անունով հայտնի կղզու լուսանկարները հրապարակած կայքը նշում է, որ այն Վանի՝ ձեռք չդիպած գեղեցկությունն է և հատկապես հրաշալի է գարնանային այս եղանակին:

Չնայած կայքը հարկ չի համարել նշել, սակայն հավելենք, որ կղզին նախկինում ամբողջովին բնակեցված է եղել հայերով: Այն գտնվում է Վանի նահանգի Տուշպա շրջանի տարածքում՝ Վանա լճի հյուսիսարևելյան հատվածում:

Հայտնի է, որ Վանի խորհրդանիշերից մեկը համարվում է Աղթամար կղզին՝ իր Սուրբ Խաչ վանքով, որը կայքը ներկայացնում է որպես «սովորական եկեղեցի»:

Կայքի հաղորդմամբ՝ կղզին ամեն տարի հյուրընկալում է բազմաթիվ տեղացի ու օտարերկրյա զբոսաշրջիկների, ովքեր հմայվում են այդ տեսարանով:

Տեղի բնակիչները լրագրողներին պատմել են, որ այնտեղ ժամանած զբոսաշրջիկները հատկապես հմայվում են կղզու ճարտարապետական արժեքներով, նրանք զբոսնում են իրենց ձկնորսական նավերով, ինչն էլ շատերի համար եկամտի կարևոր աղբյուր է:

Գյուղացիները նշել են, որ կղզու և վանքի պահպանման համար անում են ամեն ինչ՝ յուրաքանչյուր զբոսաշրջիկից հետո տարածքը վերանայման ենթարկելով: