Բաղրամյան պողոտայում տեղի ունեցած ցույցը՝ թուրքական կայքի ուշադրության կենտրոնում

Թուրքական Haberler կայքն ուշադիր հետևում է Հայստանում տեղի ունեցող իրադարձություններին:

Մի քանի օր առաջ Հայաստանում էլեկտրաէներգիայի թանկացմանն անդրադարձած կայքն անդրադարձել է նաև երեկ Բաղրամյան պողոտայում տեղի ունեցած բողոքի ցույցին:

Կայքը նշում է, որ ցուցարարները խմբվել են նախագահական նստավայրի դիմաց՝ բողոքելով էլեկտրաէներգիայի սակագնի բարձրացման դեմ: «Ոստիկանությունը ջրցան մեքենաներ և ապահովության միջոցներ է կիրառում: Երևանի փոխոստիկանապետ Վալերի Օսիպյանը ցուցարարներից պահանջել է ձևավորել իրենց պահանջները ներկայացնող խումբ, սակայն ցուցարարները հրաժարվել են»,- գրել է կայքը:

Կայքը հիշեցնում է, որ էլեկտրաէներգիայի սակագնի բարձրացման դեմ բողոքի առաջին ցույցը տեղի էր ունեցել Ազատության հրապարակում հունիսի 19-ին: