Այդ մարմինները վարչապետի քաղցր աչքի տակ պահելու միջոց է. ԱԺ, ՍԴ, ԲԴԽ նախագահները կպարգևատրվեն պետական պարգևներով

ԱԺ պետաիրավական և մարդու իրավունքների պաշտպանության հանձնաժողովում երկրորդ ընթերցմամբ քննարկվեց «Հայաստանի Հանրապետության պետական պարգևների և պատվավոր կոչումների մասին» օրենքում փոփոխություններ և լրացումներ կատարելու մասին հարցը:

Հիմնական զեկուցող` արդարադատության փոխնախարար Արթուր Հովհաննիսյանը նշեց, որ նախագիծն առաջին ընթերցումից հետո հեղինակի` կառավարության կողմից փոփոխությունների չի ենթարկվել, առաջարկություն ներկայացրել է միայն ՀՅԴ-ն: «Առաջարկել են նախագծի 6-րդ հոդվածի երրորդ մասը շարադրել հետևյալ խմբագրությամբ` հանրապետության նախագահը, վարչապետը, ԱԺ-ի ՍԴ-ի և Բարձրագույն դատական խորհրդի նախագահներն իրենց պաշտոնավարման ընթացքում չեն կարող պարգևատրվել ՀՀ պետական պարգևներով»,- ներկայացրեց նա:

Հովհաննիսյանը նշեց, որ գործող օրենքը հանրապետության նախագահին է արգելում, որպեսզի պարգևներով պարգևատրվի, այն պարզ պատճառով, որովհետև հանրապետության նախագահն ինքն է պարգևատրողը և պարգևատևողն ու պարգևատրվողը համընկնում են:

«Մենք նախագծում ավելացրել ենք նաև վարչապետը, որովհետև վարչապետին պարգևատրելու համար նախագահին միակ միջնորդողը հենց նույն վարչապետն է, սակայն ԱԺ, ՍԴ, ԲԴԽ նախագահների պարագայում, այո, նրանք միջնորդում են նախագահին` իրենց ոլորտներում  պարգևատրելու համար, սակայն վարչապետն իրավունք ունի միջնորդելու նախագահին` նրանց պարգևատրելու համար: Այսինքն` մենք վարչապետին թույլ ենք տվել ԱԺ նախագահին պարգևատրելու համար միջնորդել նախագահին: Սա է պատճառը, որ մենք այս սահմանափակումները չենք դրել: ՀՅԴ առաջարկությունը չենք ընդունել, կարծում ենք, որ կլինեն դեպքեր, երբ վարչապետը կառաջարկի այս անձանց պարգևատրել»,- պարզաբանեց նա:

ՀՀԿ-ական պատգամավոր Ռուստամ Մախմուդյանին էլ չէր գոհացնում վարչապետին չպարգևատրելու դրույթը, նա հետաքրքրվեց. «Նպատակահարմար չէ՞ր այդ դրույթը հանել»:

Հովհաննիսյանը պատասխանեց` ոչ, քանի որ վարչապետը միակ անձն է, որ կարող է միջնորդել իրեն պարգևատրելու համար:

«Ծառուկյան» խմբակցության պատգամավոր Գևորգ Պետրոսյանին հետաքրքրում էր, թե ինչո՞ւ նախագահին վարչապետը պետք է  միջնորդի բարձրագույն պաշտոններ զբաղեցնող անձանց պարգևներ տրամադրելու հարցում: «Սա այդ մարմինները` ԱԺ, ՍԴ, ԲԴԽ, վարչապետի քաղցր աչքի տակ պահելու մի միջոց է: Առաջարկում եմ` նախագահին առընթեր մարմին լինի և այն պարգևների ներկայացնի անձանց: Չէ՞ որ ՍԴ նախագահը, ԲԴԽ նախագահը, ԱԺ նախագահը վարչապետից անկախ գործող պետական մարմինների ղեկավարներ են, ուրեմն ինչո՞ւ պետք է անկախ մարմինների ղեկավարներին վարչապետը ներկայացնի պարգևատրման»,- ասաց նա:

Փոխնախարարը պատասխանեց, որ այս հարցը առաջին ընթերցման ժամանակ էլ է քննարկվել: «Սահմանադրության պահանջ ենք կատարում»,- ասաց նա:

Նախագիծը դրվեց քվեարկության և ընդունվեց առանց փոփոխությունների: