Մխիթարյանը հրաժեշտ է տվել թիմակիցներին ու գործակալի հետ մեկնել Լոնդոն. ԼՈՒՍԱՆԿԱՐ

Արդեն հայտնել ենք, որ հեղինակավոր transfer News պարբերականը հաղորդել է  Մխիթարյանի՝   «Արսենալ» տեղափոխության մասին:  Հայ ֆուտբոլիստի տեղափոխության մասին դեռևս  պաշտոնապես չի հայտարարվել, սակայն բրիտանական ԶԼՄ-ները վստահեցնում են, որ Մխիթարյանն արդեն ժամանել է Լոնդոն և Արսեն Վենգերի թիմում կդառնա ամենաբարձր վարձատրվող ֆուտբոլիստը:

«Մանչեսթեր Յունայթեդի» երեկվա մարզումից հետո երկրպագուներից մեկը նկատել է, որ մարզաբազայից դուրս գալուց հետո Մխիթարյանը հրաժեշտ է տվել թիմի կիսապաշտպան Պոլ Պոգբային և իր գործակալ Մինո Ռայոլայի հետ մեկնել Լոնդոն:

Հաղորդվում է, որ Հայաստանի ֆուտբոլի ազգային հավաքականի ավագը  «Արսենալ»-ում իր նորամուտը կնշի առաջիկա հանգստյան օրերին: 

Հիշեցնենք, որ «Արսենալի» հարձակվող Ալեքսիս Սանչեսը պայմանագիր կստորագրի մանչեսթերյան ակումբի հետ: Հայ ֆուտբոլիստը ներառված է հենց այս գործարքում: