Եկել ենք քննարկելու, թե արդյո՞ք հնարավոր է կլոր սեղան կազմակերպել. ուսանողները` Շարմազանովի հետ հանդիպման մասին

Հայտնել ենք, որ դասադուլ անող ուսանողների 5 հոգանոց խումբն այս պահին հանդիպում է ՀՀ ԱԺ փոխնախագահ Էդուարդ Շարմազանովի հետ։ «Հանուն գիտության զարգացման» նախաձեռնության անդամ Դավիթ Պետրոսյանը լրագրողների հետ զրույցում նշեց, որ իրենք եկել են քննարկելու կլոր սեղան կազմակերպելու հնարավորությունը։

«Երեկ մոտ 200 գիտնական համատեղ հայտարարություն է ստորագրել: Հիմա եկել ենք քննարկելու, թե արդյո՞ք հնարավոր է կլոր սեղան կազմակերպել, որտեղ կլինեն թե' իշխանության ներկայացուցիչները, թե' հասարակական սեկտորի», - նշեց նա։

Դավիթը նաև հայտնեց, որ իրենք դեռևս չեն քննարկում հացադուլը դադարեցնելու հարցը, ուսանողների ինքնազգացողությունն էլ լավ է։

Նշենք, որ հանդիպումն ընթանում է առանց լրատվամիջոցների ներկայության, մինչդեռ ԱԺ փոխնախագահի օգնականը ուսանողներին հավաստիացրեց, որ կլինի մեկ տեսախցիկ, որը կնկարահանի հանդիպումը։ Հանդիպմանը մասնակցում են նաև ՀՀ ԱԺ կրթության, գիտության, մշակույթի, երիտասարդության և սպորտի մշտական հարցերի հանձնաժողովի նախագահ Վարդան Բոստանջյանն ու սոցիալական և առողջապահության մշտական հանձնաժողովի նախագահ Հակոբ Հակոբյանը։