Բռնցքամարտ. Հայաստանի հավաքականը վերջին մարզումն է անցկացրել երիտասարդների ԵԱ-ից առաջ

Բռնցքամարտի Հայաստանի երիտասարդների հավաքականն այսօր Օլիմպավանում անցկացրեց վերջին մարզումը Եվրոպայի առաջնությունից առաջ: Երիտասարդների հավաքականի ավագ մարզիչ Դերենիկ Ոսկանյանի գլխավորությամբ` Հայաստանի երիտասարդների հավաքականն այս գիշեր կմեկնի Թուրքիայի Անթալիա քաղաք, որտեղ հոկտեմբերի 20-29-ը կմասնակցի Եվրոպայի երիտասարդական առաջնությունը:

ՀԲՖ մամուլի ծառայության հետ զրույցում ավագ մարզիչը խոսեց նախապատրաստական շրջանի մասին: «Նախապատրաստական շրջանի առաջին մասը ֆիզիկական պատրաստվածության համար էր, երկրորդ փուլն անցկացրեցինք Օլիմպավանում՝ շեշտը դնելով տեխնիկատակտիկական պատրաստվածության վրա: Հավաքականում նորեկներ կան, բայց դա չի խանգարի նրանց, քանի որ բոլորն էլ միջազգային մրցաշարերի փորձ ունեն: Սպասում ենք մեդալների, իսկ թե ի՞նչ գույնի կլինեն դրանք, արդեն ռինգը ցույց կտա»,-ասաց Ոսկանյանը:

Հիշեցնենք, որ առաջնությանը Հայաստանը կներկայանա 9 մարզիկով: