Արտոնություններ ունեցող քաղաքացիները մարտական հերթապահության մեջ ներգրավվելու են միայն կամավոր

Այսօր կառավարության նիստում պաշտպանության նախարար Վիգեն Սարգսյանը ներկայացրեց երկու հիմնարար նոր օրենքների նախագծեր, այն է` «Պաշտպանության մասին» և «Զինվորական ծառայության և զինծառայողի կարգավիճակի մասին» օրենքների նախագծերը:

Հիշեցնենք, որ երեկ նախագահ Սերժ Սարգսյանը հրավիրել էր Ազգային անվտանգության խորհրդի նիստ, որի օրակարգի շրջանակներում քննարկվել են «Պաշտպանության մասին» և «Զինվորական ծառայության և զինծառայողի կարգավիճակի մասին» ՀՀ օրենքների նախագծերը, քանի որ արդեն մեկնարկել է, սահմանադրական փոփոխություններով պայմանավորված, կարևորագույն օրինագծերի քննարկումների շարքը:

Մի շարք վերանայումներ են առաջարկվում զորակոչի կազմակերպման մեջ: Այսպես` վերացվում է տնից առնվազն 150 կմ հեռու ծառայելու պահանջը, որը ժամանակին ներդրվել էր կարգապահության ապահովման նպատակով: Ձևական բնույթ ունեցող արտոնությունները փոխարինվելու են բովանդակային առաջարկությամբ: Այսպես՝ արտոնություններ ունեցող քաղաքացիները մարտական հերթապահության մեջ ներգրավվելու են այսուհետ միայն կամավոր:

«Այսինքն` հիմնական արտոնությունը դառնում է մարտական հերթապահության մեջ չներգրավվելը, և երկրորդ արտոնությունը կհանդիսանա ծառայության ընթացքում երկրորդ լրացուցիչ արձակուրդը: Եթե սովորական ծառայության մեջ գտնվող զինվորն ունի մեկ արձակուրդի իրավունք, ապա այս դեպքում նրանք վեց ամիսը  մեկ կկարողանան գնալ արձակուրդ և երեք անգամ ծառայության ընթացքում տանը լինել»,- ասաց Վիգեն Սարգսյանը: