7 ամսվա կտրվածքով` ուղևորահոսքը երկու օդանավակայաններից ավելացել է 30 տոկոսով. Սերգեյ Ավետիսյան

Կառավարությանն առընթեր քաղաքացիական ավիացիայի գլխավոր վարչության պետ Սերգեյ Ավետիսյանն այսօր լրագրողների հետ զրույցում անդրադարձավ տոմսերի գների աճին: Նա տոմսերի գների աճը պայմանավորում է սեզոնով:

«Զբոսաշրջային հոսքերն ունենում են պիկային ժամանակաշրջան, և մենք հենց այս պահին գտնվում ենք այդ պիկային ժամանակաշրջանում: Տարեցտարի ամառվա վերջին և հուլիս ամսից սկսած ու ամանորյա տոներին ընդառաջ` տոմսերի գներն ու զբոսաշրջությանն առնչվող ինդուստրիայի գները բարձրանում են: Մեր երկրում տոմսերի գները սեզոնային ժամանակաշրջանին ավելի կտրուկ են արձագանքում»,- ասաց Ավետիսյանը:

Նրա խոսքով` ավիաընկերություններն իրենց ամառային չվերթերը պլանավորում են շատ ավելի վաղ և պլանավորածից ավելի շատ պահանջարկ ունենալու դեպքում, տեսնելով շուկայի ներկայիս  պրոցեսները, փորձում են փոփոխություններ մտցնել  չվացուցակի մեջ, ինչպես նաև փոխվում են օդանավերի տիպերն ու չվերթերի քանակը:

Հարցին, թե սպասելի՞ էր, որ առաջարկի փոփոխություն կլինի, և նման իրավիճակ կստեղծվի, Սերգեյ Ավետիսյանը պատասխանեց. «Ես չեմ կարծում, որ իրավիճակը քաոսային է: Ուղղություններ կան, որ նույնիսկ կրկնակիից ավելի շատ կարող է բարձրացած լինի ավիատոմսի գինը: Դա  խոսում է պահանջարկի ավելացման մասին: Կան դեպքեր, երբ ավիաընկերությունները նույնիսկ չունեն բիզնես դասի տոմսեր»:

Ավետիսյանը նշեց, որ այս տարվա առաջին յոթ ամիսների ընթացքում ներգնա հոսքերն ավելի շատ են, քան արտագնա հոսքերը: «Սա չնախատեսված պահանջարկի ավելացում է: 7 ամսվա կտրվածքով` ուղևորահոսքը երկու օդանավակայաններից ավելացել է 30 տոկոսով»,- նշեց նա: