Մեր պատգամավորների թիվը բավարար էր բյուջեի կատարողականը հաստատելու համար. Շարմազանով

ԱԺ փոխնախագահ, ՀՀԿ խոսնակ Էդուարդ Շարմազանովը կառավարության 2016թ. բյուջեի կատարողականի հաստատումից հետո լրագրողներին վստահեցրեց, որ, անկախ «Ծառուկյան» դաշինքի քվեարկությունից, ՀՀԿ-ի և ՀՅԴ-ի պատգամավորների ձայները բավարար էին բյուջեի կատարողականը հաստատելու համար: «Մեր պատգամավորների թիվը բավարար էր, առավել ևս` մեկ ձայնով էլ ավելի էր»,- ասաց նա:

Նշենք, որ Նիկոլ Փաշինյանը քվեարկությունից առաջ հայտարարեց, որ եթե «Ծառուկյան» դաշինքն ընդդիմադիր «Ելք»-ի հետ չմասնակցի քվեարկությանը, բյուջեի կատարողականը դե յուրե չի հաստատվի:

Շարմազանովը նշեց, որ ՀՀԿ-ն և ՀՅԴ-ն 54 ձայն ապահովել են, և բացատրեց, որ 53 կողմ է գրանցվել, իսկ ՀՀԿ-ական Վահան Հարությունյանի «կողմ» քվեարկությունը չի արձանագրվել տեխնիկական պատճառներով, քանի որ կոճակը չի աշխատել, բայց դահլիճում հայտարարվել է, որ նա ներկա է և կողմ է քվեարկել: Բացի դրանից՝ Շարմազանովը նշեց, որ ՀՀԿ-ական պատգամավոր Մարգարիտ Եսայանն էլ գործուղման էր և գրավոր հայտնել էր, որ կողմ է քվեարկելու:

«Ուստի ընդդիմադիրների մտահոգությունը, որ եթե «Ծառուկյան» դաշինքը չմասնակցեր, բյուջեի կատարողականը չէր անցնի, իրականության հետ որևէ աղերս չունի»,- ասաց նա և ընդգծեց, որ որևէ մեկը ուրիշի փոխարեն չի քվեարկել: