Ինքնասպան եղած կնոջ վերաբերյալ քննվող երկու քրգործերը միացվել են

ԽՍՀՄ հայտնի բռնցքամարտիկ, Եվրոպայի բազմակի չեմպիոն Կամո Սարոյանի դստեր՝ Վարդուհի Սարոյանի ինքնասպանության դեպքի առթիվ հարուցված քրեական գործը միացվել է Սարոյանից խարդախությամբ առանձնապես խոշոր չափերի գումար հափշտակելու դեպքի առթիվ հարուցված քրեական գործին: Այս մասին, Yerkir.am-ի գրավոր հարցմանն ի պատասխան, հայտնեցին ՀՀ քննչական կոմիտեից:

«Նկատի ունենալով, որ Վ. Սարոյանը դեռևս 2016թ. սեպտեմբերին հաղորդում էր ներկայացրել խարդախությամբ իր գույքը հափշտակելու վերաբերյալ, ինչի կապակցությամբ հարուցվել էր քրեական գործ՝ ՀՀ ՔՕ 178-րդ հոդվածի 3-րդ մասի 1-ին կետով, բազմակողմանի, օբյեկտիվ և լրիվ հետազոտումն ապահովելու նպատակով Վ. Սարոյանի ինքնասպանության դեպքի առթիվ հարուցված քրեական գործը 2017թ. մարտի 22-ին միացվել է նրանից խարդախությամբ առանձնապես խոշոր չափերի գումար հափշտակելու դեպքի առթիվ հարուցված քրեական գործին, որով նախաքննությունը շարունակվում է ՀՀ ՔԿ Երևան քաղաքի Կենտրոն և Նորք-Մարաշ քննչական բաժնում»,- ասված է մեզ ուղարկված պատասխանում:

Հիշեցնենք, որ 2017թ. մարտի 7-ին 1976թ. ծնված Վ.Սարոյանը ցած էր նետվել Հրաչյա Քոչարի փողոցում գտնվող շենքերից մեկի աստիճանավանդակի 4-րդ և 5-րդ հարկերի միջանցիկ հարթակից և տեղում մահացել: Դեպքի վայրի զննությամբ՝ կնոջ ձախ ձեռքին հայտնաբերվել էր կպչուն ժապավենով փակցված երկու ծրար, որոնց մեջ եղել են մատիտով կատարված ձեռագիր գրառումներ՝ ուղղված հարազատներին:

Սարոյանն ինքնասպանությունից շաբաթներ առաջ դիմել էր Yerkir.am-ին և պատմել իր ունեզրկման մասին:

ՔԿ-ից մեզ տեղեկացրին, որ Վ. Սարոյանի մահվան՝ էական նշանակություն ունեցող հանգամանքների պարզաբանման համար նշանակվել է դիակի դատաբժշկական փորձաքննություն, որի եզրակացությունը դեռ չի ստացվել:

«Քրեական գործով ձեռնարկվում են անհրաժեշտ քննչական գործողություններ, այդ թվում` հարցաքննություններ՝ դեպքի բոլոր հանգամանքները պարզելու ուղղությամբ, սակայն, քննության շահերից ելնելով, քննչական գործողությունների և դրանց արդյունքների մասին այլ տեղեկություններ այս փուլում հրապարակման ենթակա չեն»,- ասված է ՔԿ պատասխանում:

Նշենք, որ Սիմոնյանի վերաբերյալ գործում շոշափվում են մի շարք հայտնի մարդկանց անուններ: Դեպքից մեկ ամիս առաջ ՀՀ նախագահին ուղղված նամակում Սիմոնյանը պատմել էր, որ իր ունեզրկման հետ ուղղակի առնչություն ունեն պատգամավորության նախկին թեկնածու Տիգրան Տեր-Մարգարյանը և նրա ընկերը՝ ՀՀ առաջին նախագահ Լևոն Տեր-Պետրոսյանի եղբորորդին՝ Տիգրան Տեր-Պետրոսյանը: Կնոջ նամակում հիշատակվում է նաև քրեական հեղինակություն Թևոս Սաֆարյանի՝ Կայարանցի Թևոսիկի, և Արամ Վարդանյանի՝ Վստրեչի Ապերի մասին: