Բուշերի ատոմակայանը միացվել է Իրանի էներգահամակարգին

Իրանի առաջին ատոմակայանը շաբաթ ուշ երեկոյան մասամբ շահագործման է հանձնվել` մոտ 60 ՄՎտ հզորությամբ. հայտարարել է Իրանի ատոմային էներգիայի գործակալությունը:

Ինչպես տեղեկացնում է իրանական ISNA գործակալությունը, սպասվում է, որ երկրի պետական էներգահամակարգին լիարժեք միանալու դեպքում ատոմակայանը կբավարարի երկրի էլեկտրաէներգիայի պահանջի 40 տոկոսը: Սեպտեմբերի 12-ին ատոմակայանի հզորությունը հասցվելու է 400 ՄՎտ-ի, իսկ ամբողջական հզորությունը 1000 ՄՎտ է:

Բուշերի ատոմակայանի շինարարությունը սկսվել է դեռեւս 1970-ականներին` Իսլամական հեղափոխությունից առաջ` գերմանական Siemens կոնցեռնի հետ համագործակցութամբ: Ավելի ուշ նախագիծն իրականացվել է խորհրդային, ապա ռուսաստանցի ինժեներների հետ համատեղ: Ատոմակայանի շահագործման հանձնելը մի քանի անգամ հետաձգվել է: