Պարո ՛ն Սարգսյան, որ Արարատում կրի գործարան ունեք, էդ իշխանության հետ համաձայնեցվա՞ծ է. Նաիրա Զոհրաբյան

«Ծառուկյան» դաշինքի անդամներն այսօր նախընտրական քարոզարշավի շրջանակներում Կոտայքի մարզի Գառնի գյուղում էին: «Ծառուկյան» դաշինքի անդամ Նաիրա Զոհրաբյանն իր ելույթում հայտարարեց, որ քարոզարշավի ընթացքում չեն քննադատել այլ քաղաքական ուժերին, պահել են քաղաքակիրթ բանավեճի կուլտուրան, բայց այժմ ստիպված է անդրադառնալ «Ելք» դաշինքի անդամ Արամ Սարգսյանի ասածին:

«Երկու օր է` տեսնում ենք՝ որոշ քաղաքական ուժեր, որոնք հասկացել են, որ իրենց համար ելք չկա, անցել են «Ծառուկյան» դաշինքին վարկաբեկելուն, բայց դա նրանց մոտ չի ստացվելու: Նույն Արամ Զավենի Սարգսյանը  երեկ քննադատում էր «Ծառուկյան» դաշինքին և Ծառուկյանին՝ ասելով. «Մեր երկրում առանց իշխանության թույլտվության կաթի մթերման կետ էլ հնարավոր չի ունենալ»: Հիմա հարցնում եմ՝ պարո'ն Սարգսյան,  որ Արարատում կրի գործարան ունեք, էդ իշխանության հետ համաձայնեցվա՞ծ է: Բա Դուք ասում եք՝ կաթի մթերման գործարան չեք կարող ունենալ, կամ` որ քո եղբայրը Հանրապետական կուսակցության առաջին համարը գլխավորող Վիգեն Սարգսյանի խորհրդականն է և Արարատի մարզում աշխատում է Հանրապետականի համար, էդ ո՞նց ա լինում, բա դրա համար էլ դու գնացել-առաջադրվել ես Սյունիքում. բաժանել եք երկու եղբայրների մեջ»,- ասաց Զոհրաբյանը՝ հավելելով. «Մեկը Արարատի մարզում ապահովում է Արամ Սարգսյանի ասած` հանցավոր իշխանության  վերարտադրությունը, ապահովում է ամեն գնով, մյուսն էլ, իր մարզը թողած, գնացել Սյունիքում է առաջադրվել, որ եղբորը չխանգարի: Կրկնում եմ՝ չէի ասի, եթե մարդիկ չխախտեին կոռեկտության սահմանները»:

Նրա խոսքով՝ ժողովուրդն ամեն ինչ տեսնում է և կընտրի  ժողովրդի մասին մտածող քաղաքական ուժին: «Փորձում եք մարդկանց մոլորեցնել, որ դուք միակ ընդդդիմությունն ենք, բայց ժողովուրդն ամեն ինչ տեսնում է, ժողովուրդն ամեն ինչի իրական արժեքը գիտի»,- նշեց Զոհրաբյանը: