Ե՛ւ հայկական կողմն է պատրաստ փոխզիջումների, ե՛ւ Ադրբեջանը. Լեւոն Տեր-Պետրոսյան

Ո՞վ ասեց, թե հակամարտությունը չի լուծվում: Պարզապես բանակցությունները հենց նրա համար են, որ կողմերը որքան հնարավոր է ավելի շահեկան դարձնեն իրենց համար. ե՛ւ Հայաստանն է պայքարում դրա համար, ե՛ւ Ադրբեջանը: Այսպես է արձագանքել ՀԱԿ-ՀԺԿ դաշինքը գլխավորող, ՀՀ առաջին նախագահ Լեւոն Տեր-Պետրոսյանը՝ Հանրային հեռուստաընկերության «Օրակարգից դուրս» հաղորդման ժամանակ՝ ի պատասխան հարցի, թե ինչո՞ւ չի լուծվում Արցախյան հակամարտությունը:

Նա հայտարարել է, որ սկզբում տարաձայնությունները հսկայական են եղել, հիմա հասել են մեկ երկուսի: Նա նաեւ նշել է, որ ե՛ւ հայկական կողմը, ե՛ւ Ադրբեջանը պատրաստ են փոխզիջումների: Հաղորդումն ամբողջությամբ հեռարձակվելու է վաղը՝ Հանրայինի եթերում՝ 23:20-ին: