Ֆրանսիայում քրեական գործ է հարուցվել ահաբեկչությունների ենթադրյալ կազմակերպչի դեմ

Մուհամմեդ Աբրինիի նկատմամբ, որը Փարիզում եւ Բրյուսելում ահաբեկչությունների ենթադրյալ կազմակերպիչն է, Ֆրանսիայում պաշտոնապես քրեական հետապնդում է սկսվել, փոխանցում է BBC-ն:

Մարոկկոյական ծագմամբ բելգիացին կալանավորվել է 2016 թվականի ապրիլին Բրյուսելում, որտեղ նրան մեղադրանքներ են առաջադրվել Բելգիայի մայրաքաղաքի օդանավակայանում եւ մետրոյում իրականացված ահաբեկչություններին մասնակցելու համար:

Ֆրանսիայում Աբրինիին, որը նաեւ հայտնի է որպես «գլխարկով մարդը», կասկածում են 2015-ի նոյեմբերին Փարիզում մի շարք հարձակումների մասնակցության մեջ, որոնց հետեւանքով 130 մարդ զոհվել է:

Հայտնի է դարձել, որ Բելգիայի իշխանությունները Աբրինիին մեկ օրով փոխանցել են Ֆրանսիային: Աբրինիի փաստաբանների խոսքով՝ նրան դեռեւս չեն հարցաքննել: