Արգելափակումից դուրս են բերել մեքենան, իսկ քիչ անց դրա ուղևորը վրաերթի է ենթարկվել

Հունվարի 25-ին` ժամը 20.38-ին, ահազանգ է ստացվել, որ Կոտայքի մարզի Ձորաղբյուր գյուղի ամառանոցների մոտակայքում «Մերսեդես» մակնիշի ավտոմեքենան արգելափակվել է ձյան մեջ. անհրաժեշտ է փրկարարների օգնությունը:

Դեպքի վայր է մեկնել հատուկ նշանակության փրկարարական աշխատանքներ իրականացնող կենտրոնի փրկարարական ջոկատը:

Ճանապարհին՝ «Ծիրանենի» ռեստորանային համալիրի մոտակայքում, նկատել են, որ «Մերսեդես» մակնիշի բեռնատար ավտոմեքենայի կցորդը թեքվել և փակել է ավտոճանապարհի երթևեկելի հատվածը:

Փրկարարներն ուղղել են «Մերսեդես» մակնիշի YAY 777 պ/հ բեռնատար ավտոմեքենան (վարորդ՝ Լ., Վրաստանի Հանրապետության քաղաքացի), այնուհետև մեկնել ահազանգի վայր:

Փրկարարները «Մերսեդես» մակնիշի 23 LL 650 պ/հ (վարորդ՝ Է. Ա.) ավտոմեքենան դուրս են բերել արգելափակումից, ինչից հետո «ԳԱԶ 31105» մակնիշի 06 LL 505 պ/հ ավտոմեքենան (վարորդ՝ Ռ. Մ. ծնված 1982 թ.) վրաերթի է ենթարկել «Մերսեդես» մակնիշի ավտոմեքենայի ուղևոր Ա. Ղ.-ին (ծնված 1987 թ.):

Փրկարարներն Ա. Ղ.-ին տեղափոխել են «Սբ Գրիգոր Լուսավորիչ» ԲԿ, որտեղ բժիշկները վերջինիս առողջական վիճակը գնահատել են բավարար: