Կդիմենք կառավարությանը` հաստիքներ ավելացնելու խնդրանքով. գիտությունների պետական կոմիտեի նախագահ

Գիտության պետական կոմիտեում  կրճատվել է 4 հաստիք. այսօր լրագրողներին հայտնեց գիտության պետական կոմիտեի նախագահ Սամվել Հարությունյանը:

Նրա խոսքով` գիտության պետական կոմիտեն ունի ահռելի լիազորություններ, և եթե հաշվի առնեն նաև ռազմական արդյունաբերության ոլորտը, ապա ստացվում է, որ գիտության պետական կոմիտեն ունի ավելի շատ լիազորություններ, քան նույնիսկ որոշ նախարարություններ:

«Սակայն մեր հաստիքակազմը փոքր է` 39, հիմա դարձել ենք 35: Այն լիազորությունները, որոնք մենք ունենք, շատ դժվար է իրականացնել 35 հոգով: Ես վարչապետին ասել եմ դրա մասին: Իմ աշխատողները շաբաթ-կիրակի էլ են աշխատում, չենք հասցնում ուղղակի. տարեկան 11-12 մրցույթ ենք անցկացնում, դա սարսափելի ծանր աշխատանք է»,- ասաց Սամվել Հարությունյանը:

Լրագրողների դիտարկմանը, որ ստացվում է` կրճատումները արդյունավետ չեն, նա արձագանքեց, որ կրճատվել են այն երկու հաստիքները, որոնք  երկար ժամանակ զբաղեցված չէին, նաև` երկու հաստիք, որոնք գնահատվել են ոչ արդյունավետ:

«Ապագայում ես երևի կդիմեմ կառավարությանը, որ մեր հաստիքները մի քիչ ավելանան»,- ասաց Սամվել Հարությունյանը: