Սաակաշվիլիի հիմնադրած «Միասնական ազգային շարժումը» երկու թեւի է բաժանվել

Հիմնադրումից 15 տարի հետո «Միասնական ազգային շարժում» կուսակցությունը պաշտոնապես հայտարարել է երկու թեւի բաժանվելու մասին, հայտնում է «Նովոստի Գրուզիան»:

2001 թվականին Միխեիլ Սահակաշվիլիի կողմից հիմնադրված եւ 2004-ից մինչեւ 2012 թվականը իշխած կուսակցությունից  հեռացել է առաջնորդների մեծ մասը: Այս մասին հայտարարվել է այսօր կուսակցության գրասենյակում տեղի ունեցած ճեպազրույցի ժամանակ:

Առաջնորդները հայտարարել են, որ նման որոշման պատճառը կուսակցության ապագայի տեսլականի եւ քաղաքական պայքարի մեթոդների, նաեւ այդ գործընթացներում Միխեիլ Սաակաշվիլիի դերի հետ կապված տարաձայնություններն են:

Հեռացած հատվածը՝ պատգամավոր Դավիթ Բաքրաձեի եւ Թբիլիսիի նախկին քաղաքապետ Գիգի Ուգուլավայի գլխավորությամբ իրենց գլխավոր նպատակ են հայտարարել կուսակցության արդյունավետ աշխատանքի կազմակերպումը:

Նրանք հայտարարել են, որ հակված են առաջադեմ մարդկանց միավորմանը իշխանափոխության համար եւ «Բիձինա Իվանիշվիլիի ոչ պաշտոնական կառավարման դեմ» քաղաքական պայքարում: Իվանիշվիլիին նրանք ներկայումս երկրի գլխավոր խնդիրն են համարում:

Ուգուլավան ասել է, որ չնայած իրեն միշտ Սահակաշվիլիի համախոհ է համարել, բայց այժմ նրան արդյունավետ առաջնորդ չի համարում:

2016 թվականի նոյեմբերի ընտրություններում մանդատ ստացած 27 պատգամավորներից կուսակցությունը լքել են 21 պատգամավոր:

Խորհրդարանի 5 պատգամավորներ շարունակում են մնալ «Միավորված ազգային շարժման» մեջ: Առայժմ հայտնի չէ, թե պատգամավոր Ազեր Սուլեյմանովը որ թեւին կմիանա: