ԱԱԾ պետի տեղակալը ներկայացրեց Աշխաբադում ստորագրված համաձայնագրի կարևորությունը

«ՀՀ նախագահի ներկայացրած` 2012 թվականի դեկտեմբերի 5-ին Աշխաբադում ստորագրված անկախ պետությունների համագործակցության մասնակից պետությունների ահաբեկչության և ծայրահեղության և այլ բռնի դրսևորումների դեմ պայքարում իրավասու մարմինների նյութատեխնիկական ապահովման շուրջ համագործակցության մասին» համաձայնագիրը վավերացնելու մասին հարցի քննարկման ընթացքում հիմնական զեկույցով հանդես եկավ Ազգային անվտանգության ծառայության պետի տեղակալ Արզուման Հարությունյանը:

Ըստ Հարությունյանի՝ համաձայնագիրը ստորագրել են Հայաստանի, Բելառուսի, Ղազախստանի, Ղրղզստանի, Մոլդովայի, Տաջիկստանի Հանրապետությունները և Ռուսաստանի Դաշնությունը: Համաձայնագիրը վավերացրել են Բելառուսի, Տաջիկստանի Հանրապետությունները և Ռուսաստանի Դաշնությունը:

Զեկուցողի ներկայացմամբ՝ համաձայնագրի նպատակն է ԱՊՀ պետությունների ահաբեկչության և ծայրահեղության և այլ բռնի դրսևորումների դեմ պայքարում իրավասու մարմինների` հավասար և արտոնյալ պայմաններով, հատուկ տեխնիկայով, հատուկ միջոցներով, նյութերով բազմակողմանի ապահովում:

«Համաձայնագրով՝ համագործակցություն իրականացնում են հատուկ տեխնիկայի, հատուկ միջոցների հավասար և արտոնյալ պայմաններում գնման և առաքման միջոցով»,- ասաց Հարությունյանը՝ հավելելով. «Ստացող կողմը չի կարող վաճառել կամ փոխանցել համաձայնագրի շրջանակներում մատակարարված նյութատեխնիկական միջոցները երրորդ կողմին, իրավաբանական անձի կամ ֆիզիկական անձանց՝ առանց մատակակարող կողմի գրավոր համաձայնության: Կողմերը, ազգային օրենսդրության համաձայն, անհրաժեշտ միջոցներ պետք է ձեռնարկեն սահմանափակ տարածման և պետական գաղտնիք պարունակող տվյալների պաշտպանության և պահպանման համար»: