Սարի թաղում «Ազատություն» լրագրողի աշխատանքը խոչընդոտած անձը դատապարտվեց տուգանքի

Էրեբունի և Նուբարաշեն վարչական շրջանների ընդհանուր իրավասության դատարանի դատավոր Արտուշ Գաբրիելյանն այսօր հրապարակեց հուլիսին Սարի թաղում «Ազատության» լրագրող Հովհաննես Մովսիսյանի մասնագիտական աշխատանքը խոչընդոտելու վերաբերյալ գործով դատավճիռը: Դատարանի վճռով այս գործով ամբաստանյալ Տիգրան Ահարոնյանը մեղավոր ճանաչել ՀՀ քր. օր-ի 164 հոդվածի 1-ին մասով և դատապարտվեց տուգանքով` նվազագույն աշխատավարձի երկուհարյուրապատիկի`200.000 ՀՀ դրամի չափով։

Նշենք, որ համաձայն նախաքննության՝ 2016 թվականի հուլիսի 29-ին՝ ժամը 22:00-ի սահմաններում, Երևան քաղաքի Սարի թաղում տեղի ունեցած դեպքերի ժամանակ Տիգրան Ահարոնյանը նկատել է լրագրողական անվանաքարտ (բեյջ) կրող և իրադարձությունները տեսանկարահանող լրագրող Հ. Մովսիսյանին, կարծել է, թե լրագրողը տեսանկարահանում է իրեն, և լրագրողի մասնագիտական օրինական գործունեությունը խոչընդոտելու դիտավորությամբ, վիճաբանել է նրա հետ, ապա ձեռքերով հարվածներ հասցնելով ծեծի է ենթարկել՝ պատճառելով մարմնական վնասվածքներ: Այնուհետև Տ. Ահարոնյանը լրագրողից խլել է անվանաքարտը (բեյջ) ու դեպքի վայրից դիմել է փախուստի: