Սևանա լճի հատակից հայտնաբերված նավակը պատկանել է կորած ձկնորսներին

Երեկ որոնողական աշխանտանքների ընթացքում ափից 13 կմ հեռու, մոտ 25 մ խորության տակ հայտնաբերված մոտորանավակը պատկանում է մեկ շաբաթ առաջ ձկնորսության նպատակով Սևանա լիճ դուրս եկած և կորած երիտասարդներին: Այս մասին Yerkir.am-ին հայտնեց Նորատուսի գյուղապետ Մուրադ Հարությունյանը:

Նա նշեց, որ ձկնորսներին դեռ չեն գտել, սակայն շնորհիվ հայտնաբերված մոտորանավակի հավանաբար հնարավոր կլինի գտնել նրանց:

Նշենք, որ երեկ մթության պատճառով դադարեցվել էին որոնողական աշխատանքները, որոնք այսօր առավոտյան վերսկսվել են:

Հիշեցնենք, որ հոկտեմբերի 31-ին` ժամը 14.33-ին, ահազանգ է ստացվել, որ Գեղարքունիքի մարզի Նորատուս գյուղի մոտակա լճափից երկու քաղաքացի նավակով գնացել են ձկնորսության և չեն վերադարձել։  Կորել են Նորատուս գյուղի բնակիչներ Ա. Ա.-ն և Ա. Կ.-ն՝ 24 և 25 տարեկան: