«Սասնա ծռեր»-ին օժանդակելու մեջ մեղադրվող ազատամարտիկն ազատ արձակվեց

Կանադահայ բարերարները տրամադրել են 1 մլն դրամ գումար «Սասնա ծռեր»-ին օժանդակելու մեջ մեղադրվող ազատամարտիկ Սարո Այվազյանին գրավի ազատ արձակելու համար:

Yerkir.am-ը ՀՀ ԱՆ քրեակատարողական վարչությունից տեղեկացավ, որ Այվազյանն այսօր գրավի դիմաց ազատ է արձակվել «Նուբարաշեն» ՔԿՀ-ից:

Հիշեցնենք, որ մոտ 10 օր առաջ վերաքննիչ քրեական դատարանը մասնակի բավարարել էր Սարո Այվազյանի պաշտպանի բողոքն ու նրա նկատմամբ ընտրված խափանման միջոց կալանքը գրավով փոխարինելու որոշում կայացրել: Դատարանը, որպես գրավի չափ, սահմանել էր մեկ միլիոն դրամը, սակայն Այվազյանի ընտանիքը չուներ համապատասխան միջոցներ՝ գրավը վճարելու համար: Փաստորեն, գտնվել են մարդիկ, ովքեր օգնել են ընտանիքին՝ վճարելու այդ գումարը:

Այվազյանը, ով Արցախյան ազատամարտի մասնակից է, 6 երեխաների հայր, բնակվում է Երասխ գյուղում՝ վարձով: Նա կալանքի տակ էր այս տարվա հուլիսից: