Հասել է ֆաշիստ շեֆ Էրդողանի դեմ քրդերի՝ ոտքի կանգնելու ժամը. Օջալանի միությունը պայքար է հայտարարում

Քուրդիստանի համայնքների միությունը՝ KCK-ն, որի ղեկավարը Աբդուլլահ Օջալլանն է, Թուրքիայում քրդամետ ղեկավարների և պատգամավորների ձերբակալությունների մասին հայտարարություն է տարածել:

Ըստ Anfnews-ի՝ միությունը կոչ է արել երկրի և աշխարհասփյուռ քրդերին` անհապաղ ոտքի կանգնել ընդդեմ Էրդողանի գործողությունների:

«Այս ձերբակալություններն ուղղված են ժողովրդի կամքը կոտրելու դեմ: Այս ձերբակալությունները, միաժամանակ, նշանակում են նաև, որ չեն ընդունում քրդերի գոյությունը: Սա ևս մեկ անգամ բացահայտեց ցեղասպան գաղութատիրության՝ քրդի վերջը տալու քաղաքականությունն ու որոշումը»,- մասնավորապես նշվել է հայտարարության մեջ:

Ըստ հայտարարության` այս ձերբակալությունների որոշումը կայացվել է  դեռևս «ֆաշիստ շեֆ Էրդողանի և «Ազգային շարժում» կուսակցության ղեկավար Բահչելիի հանդիպման ժամանակ»: Միության համոզմամբ՝ ԱԶԿ-ն և ազգայնամոլների կուսակցությունն այսուհետ միասնաբար են գործում՝ որպես մեկ կուսակցություն: «ԱՇԿ-ի պաշտպանած բոլոր քաղաքականություններն իրագործում է ԱԶԿ-ն»,- հայտարարել է միությունը:

Հայտարարության մեջ ընդգծվում է, որ Էրդողանի և նրա կուսակցության՝ քրդերի դեմ ուղղված գործողություններին քրդերն այսուհետ հակադարձելու են դեմոկրատական ուժերի հետ:

«Այս հարձակումը ղեկավարվում է ինչ-որ կենտրոնից: Դրա արդյունքն է նաև, որ մի շարք ԶԼՄ-ներ պատգամավորների ձերբակալությունը նույն  վերնագրով են հրապարակել՝ ԺԴԿ-ի անունը ահաբեկչության հետ արծարծելով: Այլևս խոսք չկա` ասելու: Այս իրավիճակին ամբողջ քուրդ ժողովուրդն ու դեմոկրատական ուժերը միախմբված պետք է դիմադրեն»,- նշվում է հայտարարության մեջ: