Շիրակը չի կարելի համեմատել մյուս մարզերի հետ. Հովսեփ Սիմոնյան

Շիրակի մարզպետ Հովսեփ Սիմոնյանն այսօր խորհրդարանում լրագրողներին ասաց, որ մարզին հատկացվող բյուջեն հիմնականում բավարարում է առաջնային խնդիրներին լուծում տալու համար:

«Մարզի հիմնական գործունեությունն ապահովելու համար, կարծում եմ, բավարար է. մեր մարզի բյուջեն 211 միլիոն դրամով աճել է, որը հիմնականում վերաբերում է կրթության ոլորտին: Մարզում ավելացել է ներառական կրթություն իրականացնող ՊՈԱԿ-ների թիվը: Ճանապարհների ամառային ու ձմեռային հատկացումների հետ կապված ունենք աճ՝ շուրջ 22 միլիոն դրամով: Աճ ունենք նաև համայնքներին տրվող դոտացիաների առումով: Կարող եմ ասել, որ նվազագույն խնդիրները մարզում կարող ենք լուծել»,- ասաց նա:

Դիտարկմանը, թե վարչապետը հորդորել է խնայողություններ կատարել, և հարցին, թե մասնավորապես ո՞ր ոլորտներում են կատարվելու խնայողությունները, Սիմոնյանը պատասխանեց, որ խնայողությունները վերաբերում են բոլոր ոլորտներին, որտեղ հնարավոր է կատարել՝ առանց խանգարելու բնականոն գործունությանը:

Անդրադառնալով իր պաշտոնակության մասին` մամուլում շրջանառվող լուրերին՝ մարզպետն ասաց, որ իր հետ նման հարց չի քննարկվել:

Հարցին` ձախողում համարո՞ւմ եք, որ ՏԻՄ ընտրությունների ընթացքում հաջողություններ չունեցաք, մարզպետը պատասխանեց, որ մարզպետը ընտրություններին մասնակցվում է այնքանով, որքանով իր լիազորությունները թույլ են տալիս:

Դիտարկմանը, թե Շիրակի մարզը մշտապես համարվել է աղքատության և արտագաղթի բարձր ցուցանիշ ունեցող մարզ, և հարցին՝ ի՞նչ եք անելու, որ այդ չափանիշները նվազեն, պատասխանեց, որ վարչապետի հանձնարականով աշխատում են մարզի զարգացման հետ կապված ծրագրի շուրջ, և երբ պատրաստ լինի մարզի զարգացման ծրագիրը, այդ ժամանակ էլ կներկայացվի:

«Պետք է թղթին հանձնել այն, ինչն իրատեսական է, չենք կարող թղթին հանձնել անիրատեսական բաներ»,- ասաց Սիմոնյանը՝ հավելելով, որ Շիրակը չի կարելի համեմատել մյուս մարզերի հետ, քանի որ տարել է դաժան երկրաշարժ: «Մնացած մարզերում նման բան չի եղել, ենթակառուցվածքներ չեն վերացել, և մեկ քայլ մեզանից առաջ են: Աղքատության հիմնական պատճառներից մեկը դա է»,- նշեց մարզպետը:

Նա անդրադարձավ նաև մարզի բնակարանային խնդիրներին: «Բնակարանի խնդիր բոլոր մարզերում էլ կա, բայց Շիրակի մարզում տնակներում բնակվելը պայմանավորված է նաև նրանով, որ երբ մարդիկ ուզում են առանձին ապրել, գնում են տնակ, քանի որ այն ավելի էժան է»,- նշեց մարզպետը: