Խուսափեք հուզականությունից, ագրեսիվ պահվածքից ու ոստիկանների հետ լեզվակռիվներից. Արսեն Բաբայանը՝ լրագրողներին

ԱԺ հասարակայնության հետ կապերի վարչության պետ Արսեն Բաբայանն իր ֆեյսբուքյան էջում գրում է.

«Հարգելի լրագրող գործընկերներ, կասկած չունեմ, որ ուզում եք ձեր աշխատանքը լավագույնս կատարել: Կասկած չունեմ, որ նպատակ ունեք հանրությանն առավել մանրամասն տեղեկություններ տրամադրել: Միայն մեկ բան եմ հորդորում, այնպես արեք, որ ձեր օրինական գործունեության ընթացքում չխախտեք օրենք, վստահ եմ, որ չեք ուզում խախտել, բայց չի բացառվում նաև անզգուշության հետևանքով դա լինի: Ոստիկանությունն ու ԱԱԾ-ն այս փուլում իրականացնում են հատուկ միջոցառումներ, տարածք կա, որն այս պահին գտնվում է հատուկ պահպանության տակ: Խնդրում եմ իրավապահ մարմիններից հետ բախումներից խուսափել:

Աշխատեք փոխհամաձայնեցված: Հիշեք, որ ոստիկանությունն ու ԱԱԾ-ն էլ իր գործառույթներն է իրականացնում, որն, ինձ համար, բոլորիս կյանքի անվտանգության համար այս պահին շատ ավելի կարևոր է, քան տեղեկացված լինելը: Հարգելի գործընկերներ, խուսափելով հուզականությունից, ագրեսիվ պահվածքից ու ոստիկանների հետ լեզվակռիվներից, կխուսափեք նաև ակամայից ահաբեկչական գործողություններին նպաստելուց և դրանց դեմ պայքարելուն խոչընդոտելուց: Հարգելի լրագրողներ, այս իրավիճակում գործելու համար ունեք փորձի պակաս, ինչը բնական է: Փորձեք ավելի շատ լինել օրենքի սահմաններում, ենթարկվել իրավապահ մարմինների օրինական պահանջներին: Հարգելի ոստիկաններ, խնդրում եմ լրագրողների նկատմամբ ցուցաբերեք զսպվածություն, համագործակցություն: Գիտեմ, որ շատ ավելի կարևոր գործով եք զբաղված, քան ամեն հարցին պատասխանելը, բայց այդ ընթացքում էլ եղեք ավելի հավասարակշռված, ինչպես միշտ եք եղել»: