Իշխան Զաքարյանը ներկայացրեց բազմաթիվ չարաշահման դեպքեր՝ սոցփաթեթներով հանգստի մեկնելու գործընթացում

Այսօր կառավարության նիստում օրակարգին անցնելուց առաջ ՀՀ վարչապետ Հովիկ Աբրահամյանը անդրադարձավ սոցփաթեթում հանգստի բաղադրիչի կասեցման հարցին: Նա նշեց, որ հանձնարարել է Վերահսկիչ Պալատի նախագահ Իշխան Զաքարյանին այդ մասով կատարել ուսումնասիրություններ և ներկայացնել զեկույց այդ ուսումնասիրությունների արդյունքների վերաբերյալ:

Իշխան Զաքարյանը նշեց, որ ՎՊ-ն ուսումնասիրություններ է իրականացրել Հայաստանի տարբեր զբոսաշրջային համայնքների հանգստյան տներում ու հյուրանոցներում, հայտնաբերելով 300 միլիոն դրամի տարբեր խախտումներ: Իշխան Զաքարյանի խոսքով՝ խախտումներն առաջացել են հետևյալ պատճառներով. նախ պետբյուջեից գումարները տրվել են երկու ուղղությամբ՝ հանգստի կազմակերպում և առողջապահության կազմակերպում:

Գումարները ծախսվում են զբոսաշրջային օպերատորների կողմից, որոնց լիցենզավորում է էկոնոմիկայի նախարարությունը: Ըստ այդմ, սոցփաթեթի մասով ծառայություններ են մատուցում 69 զբոսաշրջային օպերատորներ, որոնցից ՎՊ-ն ուսումնասիրություններ հասցրել է կատարել միայն 7 ընկերություններում:

«Որոշ զբոսաշրջային օպերատորներ չեն կատարել իրենց պարտավորությունները և բյուջեի գումարները ծախսել են այլ նպատակներով, ինչի հետևանքով պարտքեր են գոյացել: Ամրագրման հավաստագրերից շատ հաճախ օգտվել են ոչ շահառու անձինք: Եղել են ապօրինի կանխիկացման դեպքեր, ինչը հակասում է Սահմանադրությանն ու օրենքներին:

Որոշ զբոսաշրջային օպերատորներ ծառայություններ են մատուցել, սակայն ընդգրկված չեն եղել ու հաշվառված չեն եղել էկոնոմիկայի նախարարությունում, և այդ զբոսաշրջային օպերատորների հաշվառումը կրել է ձևական բնույթ, ինչի հետեւանքով ծառայությունների մատուցումը եղել է ոչ թափանցիկ և անվերահսկելի: Շատ դեպքերում զբոսաշրջային օպերատորների կողմից կատարված փոխանցումներ չեն կատարվել բանկերին, վերջիններից տեղեկատվություն ստանալ չի հաջողվել, որովհետև հղում է կատարվել բանկային գաղտնիքի մասին օրենքին»,- սոցփաթեթների ծառայությունների մատուցման մասով խախտումների պատճառները ներկայացրեց Իշխան Զաքարյանը:

Նա նշեց, որ այս ամենը հաշվի առնելով առաջարկվում է կառավարությանը սոցփաթեթի համար նախատեսված պետբյուջեի գումարների անօրինական կանխիկացումը դադարեցնելու նպատակով լրամշակել հանգստի բաղադրիչին վերաբերող օրենսդրական կարգավորումները:

Վարչապետ Հովիկ Աբրահամյանը հարցրեց, թե ինչ են պատրաստվում անել այդ ստուգումների արդյունքների հետ կապված: Իշխան Զաքարյանը նշեց, որ ՎՊ-ն ստուգումներ կատարել է 69 զբոսաշրջային օպերատորական կազմակերպություններից միայն 7-ում, որովհետև ֆիզիկապես չեն հասցրել բոլոր օպորատորներին ստուգել: Իշխան Զաքարյանը խնդրեց ստուգումներին ներգրավել նաև վարչապետի վերահսկողական ծառայությանը, որպեսզի բոլոր օպերատորներին կարողանան ստուգել ու ամփոփ զեկույց մշակեն սոցփաթեթի վերաբերյալ:

«Սոցփաթեթի ամսով պետբյուջեն իր պարտավորությունները կատարել է 100 տոկոսով, հատկացնելով գումարները, սակայն բազմաթիվ դեպքերով զբոսաշրջային օպերատորական կազմակերպությունները ծառայություններ չեն մատուցել, դիմելով բազմաթիվ խախտումների: Հովիկ Աբրահամյանը հարցրեց, թե ինչ արդյունքներ կան մարզերում գործող սոցիալական գրասենյակներում իրականացրած ՎՊ ստուգումներից:

Իշխան Զաքարյանը նշեց, որ ՎՊ-ն ավարտել է Սյունիքի, Վայոց ձորի, Շիրակի սոցիալական գրասենյակների ստուգումները: Այս պահի դրությամբ ստուգումներ են իրականացվում Գեղարքունիքի մարզպետարանում, ստուգվում են Վարդենիսի, Գավառի, Մարտունու սոցիալական գրասենյակները, որից հետո կստուգվեն Ճամբարակի, Սևանի սոցգրասենյակները, և ամփոփ զեկույց կներկայացվի վարչապետին:

Հովիկ Աբրահամյանը նշեց. « Երբ մենք կառավարության անցած նիստում հայտարարեցինք, որ սոցփաթեթի հանգստի բաղադրիչը կասեցնում ենք միջնաժամկետ ծախսերի ծրագրում, բազմաթիվ հարթակներում սկսվեցին ահիմն քննարկումներ: Տեսանք, որ ՎՊ զեկույցի համաձայն բազմաթիվ խախտումներ են եղել, ուստի հանգստի բաղադրիչի կասեցումը միջնաժամկետ ծախսերի ծրագրում ճիշտ էր: Իհարկե, խախտումնեը վերացնելուց հետո 2017թ բյուջեի նախագիծը քննարկելիս մենք սոցիալական բաղադրիչը անպայման կընդգրկենք:

Ցավ է, որ մեր քաղաքացիները մտնում են գործարքի մեջ ոլորտի համապատասխան աշխատակիցների հետ, մինչդեռ մենք գումարը հատկացնում ենք մեր քաղաքացիների հանգստի կազմակերպման համար»,- ասաց Հովիկ Աբրահամյանը: