Գյումրու քաղաքապետարանն է բանակցել բարեկարգ փողոցային ցանց ապահովող վարկային համաձայնագրի համար

ԱԺ ֆինանսավարկային հանձնաժողովում քննարկվում է Հայաստանի Հանրապետության եւ Վերակառուցման եւ զարգացման եվրոպական բանկի միջեւ 2016 թվականի մայիսի 11-ին ստորագրված «Գյումրու քաղաքային ճանապարհներ» վարկային համաձայնագիրը:

Հիմնական զեկուցող` տարածքային կառավարման և զարգացման փոխնախարար Վաչե Տերտերյանը նշեց, որ վարկային համաձայնագրով նախատեսվում է Գյումրիում անվտանգ երթևեկության կազմակերպում, բարեկարգ փողոցների ցանցի ձևավորում, արտաքին լուսավորության անցկացումը, լուսացույցներով հագեցվածություն, ջրահեռացում, ենթակառուցվածքների արդիականացում, մայթերի նորոգում, Գյումրիում ավտոկայանատեղիների վերաբերյալ ռազմավարության մշակում:

«Այս վարկային համաձայնագրով մեծածավալ աշխատանք է նախատեսված իրականացնել Գյումրիում: Ուզում եմ շեշտել, որ առաջին անգամ Գյումրու քաղաքապետարանը ինքն է նախաձեռնել, ինքն էլ բանակցել այս վարկային համաձայնագրի իրականացման համար, ամբողջն արել է Գյումրու քաղաքապետարանը: Սա նրանց աշխատանքի արդյունքն է, վարկի մարման սպասարկումը նույնիսկ վերցրել է իր վրա»,- ասաց Վաչե Տերտերյանը: