Չեմպիոնների լիգա. Հերթական սուպերդերբիին ընդառաջ. ՏԵՍԱՆՅՈւԹ

Ֆուտբոլային աշխարհի ողջ ուշադրությունն այս օրերին կենտրոնացած է Իտալիայի Միլան քաղաքի վրա, որտեղ այսօր տեղի է ունենալու եվրոպական ակումբային ամենահեղինակավոր մրցաշարի` ՈւԵՖԱ-ի Չեմպիոնների լիգայի եզրափակիչ հանդիպումը: Այսօր Մադրիդը բաժանվելու է 2 մասի: Պատվավոր գավաթը վիճարկելու են իսպանական քաղաքը ներկայացնող  երկու թիմերը` «Ռեալ»-ն ու «Ատլետիկո»-ն:

«Ռեալ»-ի համար  միլանյան եզրափակիչը ՉԼ մրցաշարում 14-րդն է: Արքայական թիմը պատվավոր գավաթը նվաճել է 10 անգամ: 

Ի տարբերություն համաքաղաքացիների, «Ատլետիկո»-ն դեռևս չի հաղթել ՉԼ մրցաշարում: Այսօր հաղթելու դեպքում Սիմեոնեի թիմը կդառնա 23-րդ ակումբը, որը նվաճել է  Չեմպիոնների լիգայի գավաթը: 

Չեմպիոնների լիգայի պատմության մեջ 2-րդ անգամ եզրափակիչում հանդիպելու են նույն քաղաքը ներկայացնող 2 ակումբները: Հատկանշական է, որ առաջին անգամ նույնպես այս երկու թիմերն են խաղացել եզրափակիչում. 2 տարի առաջ լիսաբոնյան եզրափակիչը պարզապես խելահեղ ստացվեց:

Դիեգո Սիմիոնեի թիմը հաղթում էր 1:0 հաշվով, սակայն  մրցավարի ավելացված ժամանակի վերջին վայրկյաններին Սերխիո Ռամոսը հավասարեցրեց հաշիվը, իսկ արդեն լրացուցիչ ժամանակում արքայական թիմը քարուքանդ արեց մրցակցին: Արդյունքում «Ռեալ»-ը հաղթեց 4:1 հաշվով, և պատմության մեջ 10-րդ անգամ դարձավ ՉԼ հաղթող:

«Ռեալ»-ն «Ատլետիկո»-ին հաղթել է նաև ՉԼ 2014/15. մրցաշրջանում: «Վիսենտե Կալդերոնում» 0:0 հաշիվը գրանցվեց, իսկ  սեփական հարկի տակ «Ռեալ»-ը միայն հիմնական ժամանակի ավարտից 2 րոպե առաջ կարողացավ հաղթական գոլ խփել:  88-րդ րոպեին աչքի ընկավ Խավիեր Էրնանդեսը: 

Արդեն հայտնի է «Ռեալ»-ի հայտացուցակը: «Սերուցքայիններ»-ի գլխավոր մարզիչ Զինեդին Զիդանը եզրափակիչ խաղի համար հայտավորել է հետևյալ ֆուտբոլիստներին.

Դարպասապահներ՝ Կեյլոր Նավաս, Կիկո Կասիլյա, Ռուբեն Յանես:

Պաշտպաններ՝ Ռաֆայել Վարան, Պեպե, Սերխիո Ռամոս, Նաչո, Մարսելո, Դանի Կարվախալ, Ալվարո Արբելոա, Դանիլո:

Կիսապաշտպաններ՝ Տոնի Կրոս, Խամես Ռոդրիգես, Գարեթ Բեյլ, Կազեմիրո, Մատեո Կովաչիչ, Լուկա Մոդրիչ, Իսկո:

Հարձակվողներ՝ Կրիշտիանու Ռոնալդու, Կարիմ Բենզեմա, Լուկաս Վասկես, Խեսե:

Բուքմեյքերներն այս խաղում փոքր-ինչ առավելություն են տալիս «Ռեալ»-ին, որի հաղթանակի շանսերը գնահատվում է 2,6 գործակցով: Ոչ-ոքին գնահատվել է 3, իսկ «Ատլետիկո»-ի հաղթանակը 3,2 գործակցով:

Հիշեցնենք, որ եզրափակիչ հանդիպումը կմեկնարկի Երևանի ժամանակով 22:45-ին: