Ամենաֆունդամենտալ հարցը չընդգրկվեց Ընտրական օրենսգրքում. Հրանտ Բագրատյան

ՀԱԿ խմբակցության պատգամավոր, ՀՀ նախկին վարչապետ Հրանտ Բագրատյանն այսօր խորհրդարանում լրագրողների հետ զրույցում հայտարարեց`« այն, ինչ կատարվեց, զգալի առումով ֆռռացնոցի էր»` նկատի ունենալով ԱԺ-ի կողմից Ընտրական օրենսգրքի ընդունմանը:

Ըստ նրա`Ընտրական օրենսգրքի ամենաֆունդամենտալ հարցը չընդգրկվեց օրենսգրքում: «Կա կայուն փոքրամասնություն։ Եթե Ա թիվը մեծամասնությունն է, կայուն է, ուրեմն Բ թիվը, որը 100-ից հանած Ա-ն է, ընդդիմությունն է, ուրեմն նույնպես պետք է կայուն լինի: Իսկ նրանք արհամարհեցին այս ֆունդամենտալ հարցը»,- ասաց նա:

Բագրատյանի խոսքով` նաև կայուն մեծամասնություն ասելիս պետք է թիվը ֆիքսեին: «Իրանք ասում են` կայուն մեծամասնության համար նվազագույն թիվը ֆիքսենք, բայց կայուն փոքրամասնության համար չֆիքսենք: Այ սա խայտառակություն է»,- ասաց նա:

Դիտարկմանը, թե ասացին, որ հունիսից հետո կարող են որոշակի փոփոխություններ լինել ԸՕ-ում, Բագրատյանն արձագանքեց, «Բայց եթե ես հիմա ճիշտ եմ, ինչի՞ հիմա չեն փոխում: Ես 5 տարվա դեպուտատ եմ, մինչև հիմա ի՞նչ են խոսք տվել, որ կատարել են»: