Կամավորականների աշխատանքը կպահպանվի թե պետական, թե ոչ պետական հիմնարկների պարագայում

Այսօր կառավարության նախաձեռնած ԱԺ արտահերթ նիստում քննարկվում էր Աշխատանքային օրենսգրքում լրացումներ ու փոփոխություններ անելու մասին հարցը, որի մշակումը պայմանավորված է 2016թ ապրիլի 1-ից հետո Ադրբեջանի կողմից զինադադարի խախտման և Ադրբեջանի կողմից սանազերծած պատերազմական գործողությունների կապակցությամբ կամավորական հիմունքներով մարտական գործողությունների գոտի մեկնող անձանց համար լրացուցիչ աշխատանքային իրավունքների երաշխիք սահմանելու անհրաժեշտությամբ:

Այսինքն նախատեսվում է մարտական գործողություններին մասնակցելու ընթացքում պահպանել կամավորականների աշատանքն ու վարձատրությունը: «Ժառանգություն» խմբակցության պատգամավոր Թևան Պողոսյանը հարց ուղղեց հիմնական զեկուցող աշխատանքի և սոցիալական հարցերի նախարար Արտեմ Ասատրյանին:

Պատգամավորի խոսքով՝ գաղափարը լավն է , բայց իր մոտ տպավորություն է, որ խոսքը վերաբերելու է պետական հիմնարկներին կամ առնվազն մեծ հիմնարկներին: Մնացած դեպքերում , երբ կամավորականները աշխատում են մասնավոր փոքր հիմնարկներում, ինչպես է լուծվելու աշխատանքային պարտականությունների հարցը, եթե կամավորականի բացակայության պայմաններում նրա համար հարկ է վճարվում:

Արտեմ Ասատրյանը նշեց, որ այս լուծումը դեռևս չի կարող համարվել խնդրի համակարգային համապարփակ լուծում, սակայն այդ հարցերը քննարկման փուլում են և առաջիկայում կկայացվեն համապատասխան որոշումներ կառավարության կողմից:Նախարարի խոսքով՝ այս խնդիրն առաջացավ ապրիլյան պատերազմական գործողությունների ժամանակ, երբ մի շարք գործատուներ աշխատանքից ազատել էին կամավորականներին, և առաջարկվող այս լուծումը վերաբերում է թե պետական հիմնարկներին, թե ոչ պետական հիմնարկներին :

Թևան Պողոսյանը խնդրեց նախարարին, օրենքի ընդունման դեպքում լայն իրազեկում իրականացնել երկրում, որ գործատուները տեղյակ լինեն այդ փոփոխության մասին: Նախարարը համաձայնեց, որ կա խնդիր իրազեկման մասով, և լուծումներ կտրվեն՝ ապահովելու լիարժեք իրազեկում: