Բարոյական չէ պահանջել Սերժ Սարգսյանի հրաժարականը, երբ պատերազմը շարունակվում է. Աշոտյան

Հայաստանի ներքին եւ արտաքին կյանքում տեղի են ունենում փոփոխություններ, որոնց սկզբնաղբյուրը ԼՂՀ-ում ապրիլ ամսի պատերազմական գործողություններն են. լրագրողների հետ զրույցում ասաց ՀՀԿ փոխնախագահ Արմեն Աշոտյանը՝ նշելով, որ Հայաստանի արտաքին եւ ներքին օրակարգերը վերանայվեցին ոչ այնքան բովանդակային մասով, որքան` այդ փոփոխությունների տեմպի եւ խորություն հետ կապված:

«Կարծես կա որոշակի տենդենց որոշ շրջանակներում՝ ստեղծել արհեստական օրակարգեր, որոնք կապ չունեն պետության մարտունակության հետ: Օրակարգեր, որոնք ավելի շատ այս հայրենասիրական ալիքը սանձելու եւ նեղ հատվածական շահերի համար օգտագործելու փորձ են: Խոսքը վերաբերում է վաղուց օրակարգում եղած հարցերը կյանքի կոչելու հետ` կապված նաեւ ներքաղաքական կյանքի մշտական հարցի հետ՝ ո՞վ է լինելու իշխանություն»,- ասաց Արմեն Աշոտյանը` ընդգծելով, որ Հայաստանում կա քաղաքական կոնսենսուս, իշխանությունները ձեւավորվում են ընտրություններով, և բարոյական չէ ստեղծել արհեստական օրակարգ, պահանջել երկրի գերագույն գլխավոր հրամանատարի հրաժարականը, երբ պարտերազմը շարունակվում է, եւ երբ կա ուժերի մոբիլիզացման կարիք:

«Կան նաեւ դրական տենդենցներ, դրանց աղբյուրը նորից պատերազմն է, որը կուտակած բարոյահոգեբանական լիցքը մենք պարտավոր ենք օգտագործել ե՛ւ արտաքին, ե՛ւ ներքին կյանքում»,- նշեց ՀՀԿ փոխնախագահը:

Անդրադառնալով նախկին արտգործնախարար Վարդան Օսկանյանի կողմից կուսակցություն ստեղծելու նախաձեռնությանը, Արմեն Աշոտյանը նշեց, որ այդ փաստը վկայում է, որ նոր Սահմանադրությունը դառնում է քաղաքական իմաստով բացարձակապես լեգիտիմ:

«Այդ շրջանակներն էին, որ քննադատում էին կառավարման խորհրդարանական մոդելի ներդրումը,  «Ոչ»-ի ինտենսիվ քարոզ էին անում: Նրանք նույնպես ընդունում են նոր խաղի կանոնը»,- հավելեց նա:

Արմեն Աշոտյանի խոսքով՝ արտաքին քաղաքականությունում իշխանություններից կտրուկ փոփոխություններ պահանջելը քաղաքական կարճատեսություն է: «ՀՀ-ի` արտաքին աշխարհում ունեցած դիրքն ամրապնդվեց մեր տղաների կյանքի գնով, եւ այդ դիրքը պետք է պահել՝ շարունակելով հասարակական-քաղաքական կոնսոլիդացիան երկրի բարձագույն ղեկավարի շուրջ»,- ասաց ՀՀԿ փոխնախագահը: