«Արյունը չի ստում». Քարդաշյաններն իրենց միլիոնավոր հետևորդներին ներկայացրել են Հայոց ցեղասպանության փաստը

Հայտնի Քարդաշյան քույրերն այս տարի նույնպես անդրադարձել են Հայոց ցեղասպանության տարելիցին: Նրանք  իրենց միլիոնավոր հետևորդներին ներկայացրել են պատմական անհերքելի փաստը:

«Չեմ կարող հավատալ, որ արդեն անցել է մեկ տարի, ինչ իմ զարմուհիները, Քլոեն, Քանյեն, Նորթն ու ես այցելեցինք Հայաստան և մեր ընտանեկան պատմության մասին շատ բան իմացանք:

Այսօր Հայոց ցեղասպանության 101-րդ տարելիցն է: Ավելի քան 1,5 միլիոն հայ կոտորվել է Օսմանյան կայսրության կողմից:

Այսօր չափազանց կարևոր հիշատակի օր է ինձ և միլիոնավոր հայերի համար ողջ աշխարհում։ Մենք պետք է միասնական լինենք և օգնենք` հասնելու Հայոց ցեղասպանության ճանաչմանը»,- գրել է Քիմ Քարդաշյանը:

Իր համացանցի էջում այդ մասին գրառում է արել նաև Քիմի քույրը` Քլոեն:

«Անցյալ տարի Քիմը, Քանյեն, իմ զարմուհիները և ես հնարավորություն ունեցանք այցելելու Հայաստան առաջին անգամ, ինչը շրջադարձային էր: Հիշողություններ, որոնք ես ընդմիշտ կպահեմ: 1.5 միլիոն կորած հոգիներ: Արյունը չի ստում: 

Այսօր ոգեկոչվում է Հայոց ցեղասպանության 101-րդ տարելիցը։ Տեղեկացվածությունը ուժ է: Եթե մենք ավելին իմանանք, ավելի լավ կգործենք: Ցեղասպանություններն ու բնաջնջումները ողորմելի արարքներ են:

Պատմությունը մարդկանց հայտնելը մեր պարտքն է, ինչպես նաև մեր պարտքն է չլռել, երբ մարդիկ անցնում են տառապանքի և ծաղրի միջով: Լռությունը օգնում է տանջողին, ոչ թե տանջվողին: Ես հպարտ եմ, որ հայ եմ, և երբեք չեմ հավատա, որ իմ նախնիների պատմությունները ուռճացված են: Եկեք այսօր հարգենք բոլոր նրանց հիշատակը, ովքեր զոհ գնացին այդ անժխտելի ատելության արարքին»:

Նշենք նաև, որ Քարդաշյան քույրերը հրապարակել են նաև Ծիծեռնակաբերդում արված իրենց լուսանկարները: