Եթե կան մարդիկ, ովքեր մսխել են բյուջեի գումարները, պետք է պատասխան տան. ՀՀԿ-ական

Ստեղծված բարդ վիճակում բոլորը Հայաստանում պետք է կոնսոլիդացվեն և գործեն «Ամեն ինչ ռազմաճակատի համար» սկզբունքով. այսօր լրագրողներին ասաց ԱԺ ՀՀԿ խմբակցության պատգամավոր Վարդան Այվազյանը` խոսելով ստեղծված ռազմաքաղաքական վիճակի մասին:

Նրա խոսքով՝ ունենք փառապանծ ժողովուրդ,  վեհ երիտասարդներ: Պատգամավորն ապշած է, թե ինչպես կարող է հայ զինվորը զրկվել երկու ոտքից ու նման վիճակում խրամատից դուրս գա ու շարունակի մարտնչելը:

Հարցին, թե արդյո՞ք եղած սխալների համար չպետք է լինեն պատասխան տվողներ, Վարդան Այվազյանը պատասխանեց, որ պատասխանատուները, անշուշտ, պետք է պատասխան տան սխալների համար, բայց դրա համար էլ մեխանիզմ է պետք:

«Այո, մեր զինվածությունը զիջում էր: Այո, հօդս ցնդեցին մեր պատկերացումները, թե մեր մեծ ախպերը գալու է օգնի: Որ թերացումների համար որոշ մարդիկ  պատասխան պետք է տան, դա` հաստատ: Եթե կան մարդիկ, ովքեր մսխել են բյուջեի գումարները, իհարկե, պետք է պատասխան տան: Եթե ես եմ մեղավոր, պատրաստ եմ, որ ինձ կախաղան հանեն»,- ասաց Վարդան Այվազյանը:

Նրա խոսքով՝ տնտեսել կարելի է ամեն տեղ և բյուջեում շատ ու շատ հոդվածների փոփոխություն պետք է կատարել: Պատգամավորը նաև կարծում է, որ հայկական կողմը պետք է ուղիղ բարձրացնի հարցերը միջազգային հարթակում:

«Կան լրջագույն խնդիրներ, գոյության կռվի խնդիրն է, որ հակառակորդը մտավ, չեն ասելու, սա կապույտ է, սրան չմորթենք, սա հանրապետական է, սրան  գյուլլենք, բոլորի գլուխն են կտրելու»,- ասաց Վարդան Այվազյանը:

Հարցին, թե հնարավոր չէ՞, արդյոք, որ պետական պաշտոնյաները երթևեկեն 80-ականների մեքենաներով, Վարդան Այվազյանը պատասխանեց, որ կարող է առհասարակ հրաժարվել մեքենայից ու ոտքով քայլել: