Սեյրան Օհանյանն ԱԺ-ում ներկայացրեց, թե ինչ իրավիճակ է սահմանին

Այսօր ԱԺ-ում կառավարության հետ հարցուպատասխանի ժամանակ ՀՀԿ խմբակցության ղեկավար Վահրամ Բաղդասարյանը հարցրեց պաշտպանության նախարար Սեյրան Օհանյանին, թե ինչ վիճակ է տիրում սահմանին, որովհետև ասվեց, որ ժամանակավորապես կրակը դադարեցվել է, սակայն այսօր էլ լսվել են կրակոցներ: Պատգամավորը հարցրեց, թե այս պահի դրությամբ ո՞ր մասերում են շարունակվում կրակոցները:

Պաշտպանության նախարար Սեյրան Օհանյանը պատասխանեց, որ ՊԲ-ն իրականացրել է հմուտ գործողություններ՝ հրամանատարների ու զինվորների, կամավորականների համապատասխան բարձր պատրաստվածության շնորհիվ հասնելով հաջողությունների:

Նրա խոսքով` ՊԲ-ն իր վրա է վերցրել գործողությունների ամբողջ բեռը, մեր հետախուզությունն էլ անընդմեջ ուսումնասիրում է հակառակորդի կազմը, գործողությունների բնույթը, առաջխաղացման հնարավորությունները ու համապատասխան տեղեկություններ հաղորդում:

«Պարզապես նման տեղեկատվության շրջանակներում տարբեր ոտնձգությունների, տարբեր դիվերսիաների ու կրակի առկայության պարագայում դժվար է որոշել` որ ուղղությամբ և որտեղ կարող են լինել ոտնձգություններ, մանավանդ, որ խոսքը դասական ոճի ռազմական գործողությունների մասին չէ: Սակայն ՊԲ-ն արժանապատվորեն իրականացրեց իր առջև դրված խնդիրը: Այն տեղերում, ուր ընթացել են ամենաթեժ գործողությունները, կարող եմ ասել, որ պաշտպանական կոնֆիգուրացիայի նույնիսկ չնչին խախտման պայմաններում, իրավիճակը մեր հսկողության տակ է գտնվում, և մեր գնահատմամբ` հակառակորդը ո'չ ռազմական, ո'չ մարտավարական առումով հաջողություններ չի ունեցել, և այսօր օպերատիվ մարտավարական նախաձեռնությունը ՊԲ-ի ձեռքում է»,- ասաց Սեյրան Օհանյանը: