Դուք եք մեր ապագա վարչապետերն ու նախագահները. վարչապետը՝ նախնական ինժեներական խմբակների կրտսեր տարիքի աշակերտներին

Այսօր, ՀՀ վարչապետ Հովիկ Աբրահամյանի մասնակցությամբ, բացվեց Ինֆորմացիոն տեխնոլոգիաների ձեռնարկությունների միության 16-րդ համագումարը: Միությունը նախատեսում է մինչև 2019թ. ինժեներական լաբորատորիաներ ստեղծել հանրապետության բոլոր` 1400 դպրոցներում: Լաբորատորիաների ստեղծումը հնարավորություն կտա բարելավելու Հայաստանում ինժեներական կրթության մակարդակը, նպաստելու նոր տեխնոլոգիական սերնդի զարգացմանը և Հայաստանը մրցունակ դարձնելու տեխնոլոգիական համաշխարհային հսկաների կողքին:

Հիշեցնենք, որ միությունը ստեղծվել է 2000թ.` որպես Հայաստանում գործող տեղեկատվական և հեռահաղորդակցման տեխնոլոգիաների ոլորտի ձեռնարկությունների բիզնես ասոցիացիա:

Համագումարին ներկա էին էկոնոմիկայի նախարար Արծվիկ Մինասյանն ու ԿԳ նախարար Լևոն Մկրտչյանը:

Վարչապետ Հովիկ Աբրահամյանը ողջունեց համագումարի մասնակիցներին` շեշտելով, որ կառավարությունն էապես կարևորում է ինֆորմացիոն տեխնոլոգիաների ձեռնարկությունների դերը ՏՏ ոլորտի զարգացման գործում:

«Ոլորտը բարձրակարգ մասնագետներով համալրելու նպատակով ՀՀ կառավարությունը ձեռնամուխ է եղել հանրապետության դպրոցներում ռոբոտատեխնիկայի և ինժեներիայի խմբակների ստեղծմանը: Այս համագործակցությունը շարունակական բնույթ է կրելու: Վերջին տարիներին ՏՏ ոլորտը արձանագրում է 20-22 տոկոս տնտեսական աճ, ինչը պայմանավորված է նաև ոլորտի հանդեպ կառավարության վարած արդյունավետ քաղաքականությամբ: Մենք պատրաստ ենք աջակցել ոլորտի զարգացմանը»,- ասաց վարչապետը:

Ողջույնի խոսքից հետո ԿԳ նախարար Լևոն Մկրտչյանի, Հովիկ Աբրահամյանի ու Արծվիկ Մինասյանի կողմից ստորագրվեց հուշագիր ՀՀ հանրակրթության համակարգում նախնական ինժեներական կրթության ներդրման մասին: Հուշագրի ստորագրմանը ներկա էին նախնական ինժեներական խմբակների կրտսեր տարիքի աշակերտները, որոնց դիմելով` Հովիկ Աբրահամյանը նշեց. «Դուք մեր ապագա վարչապետերն ու նախագահներն եք»: