Ըստ որոշ լուրերի՝ Բրյուսելում ահաբեկչական գործողությունների ընթացքում հայ երիտասարդ է կորել

Խոսակցություններ կան, որ Բրյուսելում երեկ տեղի ունեցած ահաբեկչական հարձակումների ընթացքում հայ երիտասարդ է կորել, նրա ինքնությունն անգամ պարզ չէ: Այս մասին yerkir.am-ի հետ զրույցում ասաց Եվրոպայի Հայ Դատի հանձնախմբի հասարակայնության հետ կապերի պատասխանատու Պետո Դեմիրճյանը:

«Հայկական շրջանակներում խոսակցություններ կան, որ հայ երիտասարդ է կորել, փորձում ենք այդ տեղեկությունը ճշտել»,- ասաց նա՝ նշելով, որ տուժածների և զոհերի անունների  հստակ ցուցակ չկա:

Դեմիրճյանի խոսքով՝ Բրյուսելում այժմ անորոշ վիճակ է, մարդիկ վախենում են դուրս գալ տներից, գնալ աշխատանքի կամ այլ տեղ:

Հիշեցնենք, որ երեկ իրար հաջորդող պայթյուններ են որոտացել Բրյուսելի օդանավակայանում և մետրոյի կայարաններում, արդյունքում` զոհվել են երեք տասնյակից ավելի խաղաղ բնակիչներ, կան հարյուրավոր տուժածներ: Ահաբեկչության պատասխանատվությունն իր վրա է վերցրել «Իսլամական պետություն» խմբավորումը: