Աշխատանքային քննարկում-խորհրդակցություն` էկոնոմիկայի նախարարությունում

Մարտի 10-ին ՀՀ Էկոնոմիկայի նախարարությունում աշխատանքային քննարկում-խորհրդակցություն է կայացել ՀՀ Էկոնոմիկայի նախարար Արծվիկ Մինասյանի և նախարարության պատասխանատուների մասնակցությամբ: 

Քննարկվել են հայ-գերմանական հարաբերությունների, փոխգործակցության տնտեսական բաղադրիչի մասով մարտի 9-ին Նախագահ Սերժ Սարգսյանի մոտ կայացած խորհրդակցության հանձնարարականների կատարողականի և քննարկված հիմնախնդիրների ու ծրագրերի վերաբերյալ հարցեր: 

Ներկայացվել են հայ-գերմանական տարբեր բնագավառներին, այդ թվում ներդրումային, բանկային համակարգին, ավիացիայի ոլորտում համագործակցությանը և զբոսաշրջության խթանմանը վերաբերող հարցեր: Կարևորվել է մասնավոր ներդումների մուտքը Հայաստան: Նշվել է, որ գործարար կապերի հաստատման համար նախատեսվում է գերմանացի գործարարների ճանաչողական այցը մեր երկիր` տեղում համագործակցության հնարավոր պայմաններին ծանոթանալու համար: Այս համատեքստում, գործարար ծրագրերի ներկայացման համար կա հայաստանյան  մասնավոր հատվածի նախաձեռնողականության խրախուսման անհրաժեշտություն:

-Հայաստանի զարգացման հիմնադրամը պետք է շահագրգիռ լինի ներգրավելու մասնավոր  հատվածին` կոնկրետ ծրագրեր ներկայացնելու առումով, - ասել է նախարարը:

Զբոսաշրջության ոլորտում հայ-գերմանական փոխգործակցության խորացման անհրաժեշտության և հնարավոր զարգացումների համատեքստում արձանագրվել է, որ 2015 թվականին Գերմանիայից Հայաստան զբոսաշրջային այցելությունների աճ է գրանցվել: Կարևորվել է նաև ՏՏ ոլորտում համագործակցության ընդլայնումը:

Քննարկված հարցերի առնչությամբ խորհրդակցության ավարտին նախարար Արծվիկ Մինասյանը տվել է հանձնարարականներ: 

Առաջիկայում նմանատիպ քննարկում-խորհրդակցություններ կկայանան հայ-իրանական, հայ-ավստրիական և հայ-ֆրանսիական առևտրատնտեսական կապերին վերաբերող հարցերի առնչությամբ: