Հայաստանցիները Թուրքիայում զբաղվում են գողությամբ, մարմնավաճառությամբ… Թուրքիայում հայ պատգամավոր

Թուրքիայում քրդամետ Ժողովուրդների դեմոկրատական կուսակցության հայ պատգամավոր Կարո Փայլանն արձագանքել է Շիշլիում ավազակային հարձակման զոհ դարձած` 87-ամյա Հակոբ Դեմիրջիի սպանության հանգամանքներին:

Ըստ «Ակօս»-ի՝ Փայլանը հաստատել է հարձակվողների՝ ՀՀ քաղաքացի լինելու մասին տեղեկությունը, սակայն հերքել թուրքական կողմի տեղեկությունները, թե Դեմիրջիներին կապել են «խոզի կապով» (կապի ձև, որի ընթացքում զոհին կապում են այնպիսի դիրքով, որ նա քիչ տեղ զբաղեցնի):

«Նրանց «խոզի կապ»-ով չեն կապել: Սովորական պարանով կապկպել են ու  փակել նրանց բերանները»,- ասել է պատգամավորը՝ միաժամանակ բարձրացնելով Թուրքիայում ՀՀ քաղաքացիների մասնակցությամբ հանցագործությունների հարցը:

Նրա խոսքով՝ հայաստանցիները Թուրքիայում մասնակից են լինում գողության, մարմնավաճառության, թմրանյութի վաճառքի և նմանատիպ այլ հանցագործությունների: «Որպես հասարակություն՝ մենք պետք է հայաստանցիների հարցը քննարկենք»,- ասել է Փայլանը: