ԱԺ գարնանային նստաշրջանը բավական աշխատատար կլինի

Հայտնի է, որ սահմանադրական փոփոխություններից հետո ԱԺ-ն պետք է ձեռնամուխ լինի Ընտրական նոր օրենսգրքի և «ԱԺ կանոնակարգ» նոր օրենքի մշակմանը: Այսօր լրագրողների հետ զրույցում ԱԺ ՀՀԿ խմբակցության քարտուղար Գագիկ Մելիքյանը նշեց, որ ԱԺ-ում բավական լուրջ և ծավալուն աշխատանքներ են սպասվում, առաջին հերթին` ԱԺ կանոնակարգ -օրենքի փոփոխություն, հետո` Ընտրական նոր օրենսգրքի ընդունում:

«Երկուսն էլ բավական աշխատատար, քաղաքական լուրջ ծավալի  փաստաթղթեր են, և այստեղ պետք է կարևորվեն քաղաքական մյուս ուժերի կողմից արվող առաջարկությունները, դրանց քննարկումը և ընդունումը: Այդ նախագծերի վերաբերյալ կլինեն լսումներ, քննարկումներ` թե\' ԱԺ-ում ներկայացված, թե\' ԱԺ-ից դուրս քաղաքական ակտիվ ուժերի ու ՀԿ-ների հետ»,- ասաց Գագիկ Մելիքյանը` հավելելով, որ արդեն իսկ սկսվել է առաջարկությունների ընդունման գործընթացը:

Հարցին, թե արդյո՞ք ՀԱԿ-ն ու «Ժառանգությունը» ակտիվորեն կմասնակցեն այդ քննարկումներին, թե՞ կբոյկոտեն, Գագիկ Մելիքյանը պատասխանեց. «Ինչպես միշտ, էլի: Որոշ ելույթներ կունենան` հրապարակային կամ ոչ հրապարակային, բայց ամեն դեպքում ճիշտ կլինի, որ մասնակցեն»: