Մեր եկեղեցու դիրքորոշումը հստակ արտահայտվել է Պատրիարքի ուղերձներում. պաշտոնական պարզաբանում

Մեր Եկեղեցու դիրքորոշումը հայերի ցեղասպանության հարցում բազմիցս և հստակ արտահայտվել է Պատրիարքի բազմաթիվ պաշտոնական հայտարարություններում և ուղերձներում: Այս մասին Մայր Աթոռ Սուրբ Էջմիածնին տրված պաշտոնական մեկնաբանությունում ասել է Համայն Ռուսիո Պատրիարք Կիրիլի մամլո քարտուղար Ալեքսանդր Վոլկովը, տեղեկացնում է «Ռեգնում»-ը:

 ««Ռոսիա» հեռուստաալիքին տված հարցազրույցում պատրիարք Կիրիլը խոսել է Սիրիայում և Իրաքում վերջին տարիներին տիրող քրիստոնյաների սարսափեցնող և աննախադեպ  իրավիճակի մասին: Այս համատեքստում Հայրապետը  որպես օրինակ հիշատակել է Օսմանյան կայսրության պատմությունը, որտեղ այնպիսի ժամանակաշրջան կար, երբ սահմանված կարգուկանոնը  հարաբերական անվտանգություն և կայունություն էր  ապահովում  կրոնական փոքրամասնությունների կյանքում:  Նմանօրինակ կարգուկանոնի բացակայությունը, ինչպես Օսմանյան կայսրությունում 100 տարի առաջ, այնպես էլ ժամանակակից Իրաքում, Սիրիայում, Լիբիայում բերում է իրադարձությունների ողբերգական զարգացմանը:

Հենց այդ պատճառով էլ  մենք ժամանակակից իրադարձություններն անվանում ենք ցեղասպանություն: Մեր Եկեղեցու դիրքորոշումը հայերի ցեղասպանության  հարցում բազմիցս և հստակ արտահայտվել է Պատրիարքի բազմաթիվ պաշտոնական  հայտարարություններում և ուղերձներում:

 Ռուսական եկեղեցու դիրքորոշումն  անփոփոխ է, մենք մշտապես բաց և հրապարակավ պաշտպանել ենք և կշարունակենք պաշտպանել այդ դիրքորոշումը միջազգային, միջքրիստոնեական և միջտարածաշրջանային հարթակներում»,- ասվում է պաշտոնական պարզաբանաման մեջ:  

Հիշեցնենք, որ Համայն Ռուսիո պատրիարք Կիրիլը ռուսական պետական հեռուստաընկերությանը տված հարցազրույցում հայտարարել էր, թե Օսմանյան կայսրությունում բնակվող քրիստոնյա փոքրամասնություններին ոչ ոք չի սպանել: